Huerta knockout kay Marcial sa 3rd round

Hindi na tutuloy sa ASIAN games

MANILA, Philippines — Hindi masisilayan sa aksyon si Tokyo Olympics bronze medalist E­umir Marcial sa 2026 Asian Games boxing competitions sa Nagoya, Japan.

Sariwa pa si Marcial sa  matamis na third-round knockout win laban kay Omar Huerta sa kanilang bakbakan kahapon sa Pechanga Arena sa San Diego, California.

Isang solidong atake ang pinakawalan ni Marcial sa third round may 1:54  pang nalalabi sa oras.

Lumagapak si Huerta kung saan hindi ito nakabangon ng maayos sa loob ng 10 segundo para tuluyang ibigay ng referee kay Marcial ang panalo.

Umangat sa imakuladang 8-0 rekord si Marcial sa kanyang professional boxing career kasama ang limang knockouts.

Sa kabila ng panalo, nagpasya ang kampo ni Marcial kasama ang pamunuan ng Association of Boxing Alliances of the Phi­lippines (ABAP) na huwag nang tumuloy pa sa Asian Games sa Japan.

Orihinal na nakalineup si Marcial sa national team na sasabak sa quadrennial meet.

Ngunit inihayag kahapon ni ABAP president Marcus Jarwin Manalo na hindi na maglalaro pa si Marcial sa Asian Games upang makapagpahinga ito.

Malaking problema rin ang pagkakaiba ng oras ng Japan at Amerika kung saan posibleng hindi agad makaagapay ang Pinoy boxer

“I spoke to Eumir right after winning his professional fight earlier. After carefully considering the si­tuation, Eumir and I agreed that it would be better to skip the Asian Games,” ani Manalo.

Pakay sana ni Marcial na malampasan ang kanyang silver finish noong 2023 Asian Games sa Hangzhou, China.

“It would be very hard for him to immediately transition from a professional fight in the US, into long-distance travel to Nagoya with 16-hr time difference, and then into another high-level boxing competition with such a short recovery period,” ani Manalo.

Prayoridad ng ABAP ang kalusugan ni Marcial dahil may mga susunod na laban pa itong lalahukan kabilang na ang 2028 LA Olympics.

“Boxing is a physically demanding and inherently risky sport, and adequate time to rest and recover is extremely important, and we do not want to compromise Eumir’s health and safety because of the tight timeline,” dagdag ni Manalo.

Sasabak na lamang si Marcial sa Asian Indoor and Martial Arts Games (AIMAG) na gaganapin sa Disyembre.