Team Philippines asam 4 gymnastics gold

MANILA, Philippines —  Sa likod ni Paris Olympic double-gold medalist Carlos Yulo, apat na ginto ang puntirya ng Philippine gymnastics team sa 20th Asian Games sa Aichi-Nagoya, Japan.

Hindi pa nananalo ng gold medal ang bansa sa gymnastics event ng quadrennial meet.

Kumpiyansa si Gymnastics Association of the Philippines president Cynthia Carrion na makakakuha sila ng tatlong ginto sa men’s artistic gymnastics at isa sa women’s artistic gymnastics.

Inaasahang mananalo ng gold si Yulo matapos kumolekta ng dalawa sa 2024 Paris Olympics.

Wagi rin ng ginto si Yulo sa World, Asian Championships at Southeast Asian Games.

Ngunit wala pang gold medal ang 26-anyos na top gymnast sa Asiad.

Nakatakda ang artistic gymnastics competition sa Setyembre 21 hanggang 25 sa Rainbow Hall ng Nippon Gaishi Hall.

Bukod kay Yulo, posible ring kumuha ng ginto ang kanyang utol na si Eldrew, ayon kay Carrion.

Ito ang Asiad debut ng 18-anyos na si Eldrew.

Si Paris Olympian Levi Ruvivar naman ang ma­ngu­nguna sa women’s team kasama si Asian Championship veteran Kylee Kvamme.

Ang 14-man squad ay kinabibilangan din nina Juancho Miguel Besana, Justine Ace de Leon, Za­chary Cortins Nuñez, Chia­ra Dawn Andrew, Lauren Supnet at Haylee Garcia sa artistic gymnastics at sina Breanna Labadan at Jasmine Althea Romulo sa rhythmic.

Sasalang sina Jerry Ilano Jr. at Luvicar Janine Padilla sa trampoline.

Magsisimula ang rhythmic event sa Oktubre 1 hanggang 3, habang mauuna ang trampoline sa Setyembre 27.