UC Webmasters gilihian og impresibong kadaogan

CEBU, Philippines — Ang University of Cebu (UC) Webmasters misikad sa ilang kampanya uban ang 81-47 nga paglampaso sa sister-team nilang University of Cebu Lapu-Lapu and Mandaue (UCLM) sa Cebu Schools Athletic Foundation, Inc. (CESAFI) Season 26 basketball tournament niadtong Domingo, Septiyembre 6, sa Cebu Coliseum.

Ang tanan gawas sa usa sa 15 ka players nga gipatikang ni coach Kernn Sesante sa korte naka-iskor sa usa ka balanse kaayong opensiba.

Si Luther Leonard mikadlit og 13 puntos, siyam ka rebounds, tulo ka assists, usa ka steal ug usa ka block samtang si Maverick Eligoyo milansang sab og 13 puntos uban ang tulo ka rebounds, usa ka assist aug usa ka steal alang sa Webmasters, nga wala na molingi pa sukad sila misuroy sa sayong 26-8 nga labaw. Ang Webmasters miinat sa ilang bentaha ngadto sa 60-34 human sa tulo ka kuwarter sa wala pa kini miburot ngadto sa 38 puntos sa naghinapos nga bahin duwa.

Si Javier Palco mitapos uban ang 12 puntos, tulo ka rebounds, usa ka assist ug usa ka steal alang sa UCLM, nga nakatilaw sa ikaduha nilang sunod-sunod nga pildi.

Sa laing collegiate matchup, si Serge Gabines mipupo og double-double nga 21 puntos ug 12 ka rebounds sa dihang gipayaka sa Benedicto College (BC) Cheetahs ang University of the Philippines (UP) Cebu Fighting Maroons, 81-72, alang sa ikaduha nilang sagunson nga daog.

Midugang si Den Rick Orgong og 14 puntos ug unom ka rebounds, si Kennenth Babalcon miamot og 11 puntos, lima ka rebounds ug lima ka assists samtang si Alcher John Pabalan miposte og double-double nga 10 puntos ug 10 ka rebounds alang sa Cheetahs.

Si AJ de los Reyes maoy nangu sa UP Cebu uban ang 14 puntos ug upat ka rebounds samtang si Andrew Padilla mihipos og 12 puntos, tulo ka rebounds, duha ka assists  ug duha ka steals sa pildirong kawsa. Sa juniors division, si Cedric de la Rosa miharos og 27 puntos, 16 ka rebounds, tulo ka assits, lima ka steals

ug duha ka blocks aron ibandera ang Cebu Eastern College (CEC) Dragons ngadto sa 67-54 nga pagpakaging sa University of Southern Philippines Foundation (USPF) Baby Panthers.

Si Gillan Niño Llanos mitampo og 14 puntos, usa ka rebound ug tulo ka assists aron tabangan ang Dragons pagkulit sa ikaduha nilang sunod-sunod nga daog.

Sa laing resulta, si Jhun Miguel Telmo mikolekta og 19 puntos ug upat ka rebounds aron pangulohan ang  University of San Jose-Recoletos (USJ-R) Jaguar Cubs ngadto sa 65-48 nga paglatigo sa Cebu Institute of Technology-University (CIT-U) Junior Wildcats.