Dizon, Zamora nanghawod sa Milo Marathon-Cebu leg

CEBU, Philippines — Sila si John Marc Dizon ug Michelle Zamora, nga parehong mga atleta sa University of San Carlos (USC) ubos sa paggiya ni coach Arvin Loberanis, maoy midominar sa Cebu leg sa Milo Marathon nga gipahigayon didto sa Gatewalk Central sa dakbayan sa Mandaue niadtong weekend.

Si Dizon, lumad gikan sa isla sa Samal, milampos pagdepensa sa iyang titulo sa men’s 21K nga iyang gihuman sud sa usa ka oras ug 12 minutos

Sila si Jonry Pelones ug Jerome Casinillo sa Spectrum Runners Club ang mipahiluna sa ikaduha ug ikatulong dapit. Sa women's division, si Zamora sa Bais City ang gikoronahang hara human mipatak og usa ka oras ug 32 minutos sa makutas nga lumba.

Gawas nga mibulsa og ganting salapi, sila si Dizon ug Zamora mao sab ang morepresenta sa Cebu sa National Finals nga gikatakda karong Disiembre 6 didto sa Clark City, Pampanga.

Sa laing bahin, ang mga Spectrum runners miukha og atensiyon diin sila si Kendra Taroy, Xyrah Atis ug Scarlet Aras miharos sa nag-unang tulo ka puwesto sa girls 3K. Sila si Mark Joseph Barenio ug Zues Lecera miangkon sa nag-unang duha ka dapit sa men’s 5K, samtang si Jane Pangalao ang nanghawod sa women’s 5K. Sa 10K, sila si Mark Mahinay ug Prince Joey Lee ang milabi sa nag-unang duha ka puwesto samtang si Glaiza Hamora mipahiluna sa ikaduhang dapit sa women’s category.