Santiago isasalang ng Creamline vs Galeries Tower

MANILA, Philippines — Isasalang ng Creamline ang nagbabalik na si Jaja San­tiago sa pagsagupa sa Galeries Tower sa 2026 Pre­mier Volleyball League (PVL) On Tour sa Victorias City Coliseum sa Negros Occidental.

Lalabanan ng Cool Smashers ang High Risers nga­yong alas-6:30 ng gabi matapos ang laro ng Farm Fresh Foxies at Capital1 Solar Spikers sa alas-4 ng hapon.

Ito ang unang laro ni Santiago, kilala na bilang Sachi Mino­wa matapos mapangasawa si Alas Pilipinas Wo­men head coach Taka Minowa at maging Japanese citizen, sa PVL makaraan ang limang taon.

“It’s really good to be back. Na-miss ko talaga ang mga ganito dito sa Pilipinas,” wika ni Santiago na naglaro sa sisterhood showdown ng Creamline at Choco Mucho sa Cagayan de Oro. “So sobrang happy and excited ako to play here again.”

Binanderahan ng 6-foot-4 middle blocker ang Chery Tiggo Crossovers laban sa Cool Smashers sa pagrereyna sa inaugural 2021 PVL Open Conference ba­go maglaro sa Japanese league.

Makakatulong ni Santiago sa Creamline sina Alyssa Valdez, Jema Galanza, Tots Carlos, Michelle Gumabao, Kyle Negrito, Lorie Bernardo at Ishie Lalongisip.

Itatapat naman ng Galeries Tower sina top scorer Erika Deloria, Jean Asis, Roselle Baliton at veterans Aiza Maizo, Camille Victoria at Lycha Ebon.

May 1-0 record ang Cool Smashers sa ilalim ng nag­dedepensang PLDT High Speed Hitters (2-0), ZUS Coffee Thunderbelles (2-0) at Nxled Chameleons (2-2) kasunod ang Foxies (1-1), Highrisers (1-1), Akari Chargers (1-2),  Solar Spikers (0-1) at Flying Titans (0-3).

Makakasama ng PLDT, Creamline, Farm Fresh at Nxled sa darating na 2026 PVL Invitational Conference ang mga guest teams na EST Cola ng Thailand at Ho Chi Minh City ng Vietnam.

Nakatakda ang two-week tournament sa Agosto 31 hanggang Setyembre 8 sa Smart Araneta Coliseum.