Tanso ni Adriano nagsalba sa Team Philippines
MANILA, Philippines — Ang bronze medal ni national karateka Marie June Adriano ang tanging napanalunan ng Team Philippines sa 20th Asian Games kahapon sa Aichi-Nagoya, Japan.
Ito ay matapos ang silver medal ni mixed martial artist Jean Claude Saclag at tig-isang bronze ni mixed martial arts fighter Carlos Alvarez at ng women’s team kata noong Martes.
Tinalo ni Adriano si Ya-Chi Chung ng Chinese-Taipei sa women’s kumite 50-kilogram division sa agawan sa tansong medalya.
Bigo namang makakuha ng medalya sa men’s all-around team event ang tropa nina Paris Olympics double-gold medalist Carlos Yulo, Eldrew Yulo, Migs Besana, Justine Ace De Leon at Zachary Nunez sa pagkahulog sa sixth place.
Nakatakdang sumalang ngayong araw ang national women’s team sa all-around team finals.
Sa 3x3 basketball competition, swak sa quarterfinal round ang Gilas Pilipinas Men’s at Women’s teams matapos walisin ang kanilang mga group stages.
Sa swimming, wala pa ring nalangoy na medalya ang bansa matapos mabigong maka-podium sina Xiandi Chua at Gian Christopher Santos sa women’s 400m Individual Medley at men’s 200m freestyle, ayon sa pagkakasunod.
Olats din ang mga national tankers sa mixed 4x100 Medley Relay.
Sa weightlifting, bagama’t hindi nakabuhat ng medalya sa kanyang Asiad debut ay nagtala naman si Rosegie Ramos ng bagong Philippine record sa women’s 53kg sa kanyang 93kg sa snatch at 110kg sa clean and jerk para sa total lift na 203kg.
Sa boxing, swak si Junmilardo Ogayre sa Round of 16 matapos ang 3-2 panalo kay Lundaa Gantumur ng Mongolia sa men’s 60kg division.
Unang nakapasok si Norlan Petecio sa Round of 16 ng men’s 70kg class noong Lunes.
Sa fencing, bigo sina Sam at Janna Catantan, Christian Jester Concepcion at Eunice Daniel Villanueva na makapasok sa semifinals.
Sa rowing, pasok si Olympian Joanie Delgaco sa Final A medal race sa women’s single sculls.
Sa baseball, talsik sa medal round ang national men’s team matapos ang 0-7 kabiguan sa Japan.
Sa women’s beach volleyball, winalis ng tambalan nina Sofia Pagara at Khy Progella ang nakaharap na Mongolian tandem, 2-0, para umabante sa Round of 16.
- Latest
