Alas Women minalas sa tanso
MANILA, Philippines — Minalas ang Alas Pilipinas na makuha ang bronze medal matapos yumukod sa Indonesia, 20-25, 19-25, 22-25, 16-25, sa pagtatapos ng Week 1 ng 6th Southeast Asia (SEA) V Cup Women’s Volleyball kahapon sa Dong Anh Gymnasium sa Hanoi, Vietnam.
Bumida sina Bella Belen, Alyssa Solomon, Niña Ytang at Dell Palomata para sa Nationals na walang naipanalong laro sa nasabing four-team, single round-robin competition.
Ang mga Indonesians din ang bumigo sa mga Pinay spikers na masikwat ang tansong medalya sa nakaraang 33rd Southeast Asian Games sa Thailand noong Disyembre.
Nauna nang natalo ang Alas Women sa host Vietnam, 27-29, 17-25, 25-20, 18-25, at sumuko sa defending Leg 1 champion Thailand, 17-25, 25-19, 15-25, 25-18, 10-15.
Mula sa Vietnam ay bibiyahe ang Nationals ni Japanese coach Taka Minowa sa Chiang Mai, Thailand para sa SEA V Cup Week 2 na papalo sa Agosto 7 hanggang 9.
Ang SEA V Cup ay bahagi ng paghahanda ng Alas Women para sa nalalapit na 20th Asian Games sa Aichi-Nagoya, Japan na nakatakda sa Setyembre 19 hanggang Oktubre 4.
Huling nakasali ang mga Pinay hitters sa Asiad noong 2018 sa Jakarta, Indonesia kung saan sila nalaglag sa pang-walong puwesto.
- Latest
