Eala-Svitolina rematch sa dc open quarters

MANILA, Philippines — Ang semifinal berth ang puntirya ni Pinay tennis sensation Alex Eala sa pagsagupa kay tournament second seed Elina Svitolina ng Ukraine sa quarterfinals ng Mubadala Citi DC Open sa Washington, USA.

Nakatakda ang rematch ng World No. 28 na si Eala at ng No. 10 na si Svitolina ngayong alas-6:30 ng umaga (Manila time).

Nauna nang winalis ng 21-anyos na si Eala ang 31-anyos na si Svitolina sa quarterfinals din ng nakaraang Berlin Open, 6-3, 6-4, sa kanyang pagsabak sa una niyang grass-court season.

Unang tinalo ni Eala si 2024 Olympic Games champion Zheng Qinwen ng China sa first round bago isinunod si 2025 DC Open champion Leylah Fernandez, 6-2, 7-6 (7-1), sa second round.

Dinaig din ni Eala si Svitolina sa doubles ng ASB Classic kung saan nakatambal ng Pinay ace si 14-time Grand Slam doubles champion Venus Williams.

Naitakda ni Svitolina ang muli nilang pagtutuos ni Eala matapos sibakin si Polina Kudermetova ng Uzbekistan, 7-6 (4), 6-4, sa second round.

Ang tiwala sa kanyang sarili ang muling sasandigan ni Eala sa pagsagupa kay Svitolina.

“I think I’ve always had that in me. I think it’s definitely a mindset that you have,” ani Eala. “That being said, I think it’s been trained, or I’ve practiced it. I’ve had more experience now to implement that mindset at a higher level.”

Ang pagresbak kay Eala ang hangad ni Svitolina bukod sa pagpasok sa semis.

“It was not an easy battle for me,” sabi ng Ukrainian sa duwelo nila ng Pinay netter sa Berlin Open. “It’s a new surface, new country, a new city, so it’s a new challenge, and hopefully I’m going to draw some confidence from today’s match.”

Samantala, sinabi ni DC Open chairman Mark Ein na 80 percent ang itinaas ng ticket sales ng torneo dahil sa popularidad ni Eala.