Tungod sa kusog nga tukar, 2 angol

CEBU, Philippines — Duha ka langyaw ang naangol sa duha ka managlahing panaglalis tungod sa kusog nga tukar sa musika sa Cebu City ug sa Toledo City. Nadakpan usab ang duha ka suspek ug nag-atubang na og mga kaso.

Sa Cebu City, nadakpan ang usa ka 38-anyos nga Papuan nga taga Papua New Guinea human giingong gibunalan niya og botelya sa beer ang usa ka 32-anyos nga Ghanaian sa gawas sa convenience store sa M. Velez Street, Barangay Capitol Site, alas-2:30 sa kaadlawon niadtong Huwebes, Hulyo 9.

Sa imbestigasyon sa Abellana Police Station, bag-o pa lang nimata ang biktima nga nagpuyo sa ikaduhang andana sa convenience store ug nanaog aron mokaon.

Didto niya nakita ang suspek ug duha ka kauban nga nag-inom samtang kusog ang tukar sa ilang portable speaker. Gihangyo sa biktima ang grupo nga hinayan ang ilang musika tungod kay gabii na.

Mituman una ang grupo apan wala madugay, gipakusgan na usab nila ang tukar tungod niini, mibalik ang biktima aron sila badlungon.

Samtang nangayo og pasaylo ang usa sa mga Papuans, kalit nga nibarug ang suspek ug diretsong gibunalan og botelya sa beer ang agtang sa biktima.

Daling nidagan ang biktima samtang misulay og ikyas ang suspek apan gigukod ug gipugngan siya sa ubang kostumer hangtod miabot ang mga pulis. Naangol usab ang suspek atol sa kagubot.

Matod ni Police Major Aris Tormo, officer-in-charge sa Abellana Police Station, nagpabilin ang suspek  sa kustodiya sa kapolisan karon,

Sa Toledo City, usa usab ka 59-anyos nga Greek national ang naangol human giingong gitigbas sa iyang 69-anyos nga bayaw human  sa panaglalis tungod sa kusog nga tukar sa musika alas-6 sa gabii niadtong Miyerkules, Hulyo 8, sa Barangay Sagay.

Base sa imbestigasyon, bag-o pa lang nakauli ang biktima ug iyang asawa gikan sa Cebu City ug nagpahulay sa ilang balay sa dihang nakamata siya tungod sa kusog nga tukar sa musika gikan sa balay sa suspek.

Giadto sa biktima sa balay sa suspek ug gihangyo nga hinayan ang tukar apan nasuko kini ug gitigbas  sa wala nga mata ug sa wala nga ngabil ang biktima gamit ang sundang . Nasayran usab sa kapolisan nga pirme ng maglalis ang duha tungod  gihapon ani.

Gidala dayon ang biktima sa Toledo City Hospital  samtang nadakpan  sa follow-up operation ang suspek . Narekober sab ang 19-pulgadang sundang nga gituohang gigamit sa krimen.

Matud ni Police Lieutenant Colonel Verniño Noserale, hepe sa Toledo City Police Station gikatakdang pasakaan og kasong frustrated homicide ang suspek. (BANAT NEWS)