436 ka tawo nangadakpan

CEBU, Philippines — Nadakpan sa Cebu Police Provincial Office (CPPO) ang 436 ka mga nakalapas sa lokal nga ordinansa atol sa 237 ka police operations nga gipahigayon sa tibuok lalawigan sa Sugbo niadtong Hulyo 10, isip kabahin sa Safer Cities Initiative. Sa report sa CPPO, 319 sa mga nakalapas gipamultahan, samtang 117 ang gipasidan-an ug gipagawas human sa police intervention. Mokabat sa P115,100 ang kantidad sa mga multa nga nakolekta.

Lakip sa mga nasakpan ang 37 ka nag-inom sa pampublikong lugar, 21 ka nanigarilyo sa mga lugar nga gidili, 14 ka naglakaw nga walay sapot sa ibabaw, 28 ka menor de edad nga nakalapas sa curfew, pito ka kaso sa pagpatukar og karaoke lapas sa gitugot nga oras, ug 319 ka nakalapas sa mga ordinansa sa trapiko sa mga lungsod ug siyudad.

Matod sa CPPO, kabahin kini sa Safer Cities Initiative sa Department of the Interior and Local Government (DILG), nga nagtumong sa pagpakunhod sa krimen pinaagi sa mas lig-on nga police visibility, padayon nga pagpatuman sa balaod, ug pakigtambayayong sa mga lokal nga panggamhanan ug komunidad.

Samtang, giingon ni Police Colonel Abubakar Udang Mangelen Jr., director sa CPPO, nga ipadayon sa ilang opisina ang pagpahigpit sa mga police operation ug pagpalig-on sa pakigtambayayong sa komunidad aron masiguro ang kaluwasan sa mga Sugboanon. (BANAT NEWS)