Acid Rain nihulga sa Cebu

CEBU, Philippines — Mipagawas og pasidaan ang Department of Environment and Natural Resources–Environmental Management Bureau sa Central Visayas bahin sa acid rain nga hulga karon sa Metro Cebu ug mga silingang probinsya bisan pa man og “good” ang air quality readings.

Sa EMB telemetry data kagahapon sa udto nagpakita nga PM2.5 ug PM10 concentrations ang nakita sa Talisay ug TVI stations nga ubos ra sa critical thresholds, apan gihimug-atan sa mga opisyal nga ang sulfur dioxide gases gikan sa Mt. Kanlaon napalid sa hangin gikan sa south southwest ug nasagol karon sa nasinating mga pag-ulan sa rehiyon.

“With the ongoing rainy weather, these gases can mix with atmospheric moisture to create acid rain,” pasidaan pa sa EMB-7.

Matud pa sa DOST-PAGASA ang Acid rain  mahitabo lang kun ang  sulfur dioxide o asupre ug nitrogen oxides mo-react kun masagol sa water vapor, oxygen, ug uban pang kemikal sa kahanginan, ug maporma kining sulfuric and nitric acids nga madala sa pag-ulan.

Sukwahi sa normal nga ulan,  nga medyo taas og acidic pH tungod sa pagkalanay o pagkahilis sa carbon dioxide, ang acid rain mas grabe kaisog o corrosive nga makahilos sa panit.

“Acid rain can cause mild skin irritation, harm backyard crops, and corrode exposed metal surfaces (like roofs and vehicles”,” matud pa sa advisory sa EMB.

Tungod niini, gipahimangnoan ang mga resident nga magpabilin sulod sa ilang mga balay kun mobunok ang ulan, manghimasa ug maayo ug hugasan ang buhok kun nabasa sa ulan  ug tabunan ang mga butanganan og tubig aron dili makontamina sa asido sa uwan.

Gidasig sab sa EMB ang publiko nga magsul-ob og N95 o KN95 masks ug protective eyewear sa gawas, ipasilong ang mga sensitibong tanom ug hawanan gikan sa mga abo ang mga atop ug dili na paabutong mogahi ni.

Matud pa sa EMB, ang acid rain  makadaut sa mga tanom ug makapadali sa pagkataya sa mga gamit kun dili banwasan og limpyong tubig.

Ang warning nadungan sa pagpagawas sa PAGASA bulletin bahin sa Typhoon Inday, nga padayung nibira sa habagat.

Sa localized weather forecast kagahapon, nakita nga 70 porsiyento nga dunay masinating pag-ulan sa Cebu,  kusog nga hanging habagat  nga moabot og 25 ngadto sa 40 kilometros kada oras, ug balurong kadagatan.

Si Cebu City Mayor Nestor Archival misuspenso sa mga klase gikan sa nursery hangtud senior high school sa public ug private schools tungod sa hulga sa panglawas tungod sa abo nga nasagot sa hangin, acid rain ug poor visibility.

Ang mga college administrators mao nay gipadesisyon kun magklase sila o dili.

Ang PHIVOLCS pabilin nga gibutang sa Alert Level 2 ang Mt. Kanlaon ug gidid-an ang pagsulod four kilometer Permanent Danger Zone. Gawas sa acid rain, nipasidaan sab ang mga opisyal batok sa lahar flows kun masagol ang abo gikan sa bulkan ug tubig baha.—Gikan sa The Freeman/IBM BANAT NEWS