Dyip boundary kaagad

Grigsby ipinalit ng Ginebra kay Brownlee

MANILA, Philippines —  Sinagasaan ng Terra­firma ang import-less Titan Ultra, 113-100, sa pagsisi­mula ng PBA Season 50 Go­vernors’ Cup ka­hapon sa Ynares Center sa Anti­po­lo City.

Sinamantala ng Dyip ang paglalaro ng Giant Risers na walang import pa­ra ilista ang 1-0 record sa Group A na kinabibilangan din ng nagdedepensang TNT Tropang 5G, San Mi­guel Beermen, Converge FiberXers, NLEX Road War­riors at guest team Ma­cau Giant Pandas.

Humakot si import Justin Strings ng 25 points at 16 rebounds para sa bu­we­namanong panalo ng Terrafirma, habang kumo­lekta si No. 1 overall pick Geo Chiu ng 19 markers at 23 boards.

Hindi nakalaro si Titan Ultra reinforcement James Milton dahil sa kabiguang makakuha ng FIBA clea­rance.

Mula sa 51-46 abante sa halftime ay pinalobo ng Dyip ang kanilang kalamangan sa 67-60 sa third period.

Naagaw ng Giant Ri­sers ang bentahe sa 74-73 mula sa isang 14-6 atake tampok ang tig-isang three-point shot nina Aris Dimaunahan at Pao Javillonar.

Nabawi ng Terrafirma ang 79-76 third quarter lead patungo sa pagtatala ng 107-94 abante sa hu­ling 2:37 minuto ng fourth period.

Samantala, ipaparada ng Season 50 PBA Commissioner’s Cup champion Barangay Ginebra si import Riley Grigsby.

Ang 6-foot-6 na si Grigsby ang pansamantalang pa­palit kay resident import Justin Brownlee na may hamstring injury.

“He’s 26 years old and has had NBA G League ex­­perience and has come with some strong recom­men­dations from his coa­ches there,” ani Gin Kings coach Tim Cone kay Grigsby. “We’re excited about working with him.”

Isasalang ng Ginebra si Grigsby sa kanilang unang laro sa Hulyo 19 laban sa Phoenix sa Smart Araneta Co­liseum.