Wong, wushu team magsasanay sa China
MANILA, Philippines — Pamumunuan ni six-time Southeast Asian Games gold medal winner Agatha Chrytenzen Wong ang 11 pang miyembro ng Philippine wushu team na magsasanay sa China.
Ito ay bilang preparasyon sa 2026 Wushu World Cup sa China sa Hulyo at sa Asian Games sa Aichi-Nagoya, Japan sa Setyembre.
Ang 28-anyos na si Wong ang babandera sa national taolu team kasama sina Jones Llabres Inso, Alexander Gabriel De Los Reyes, Mark Anthony Polo, Mark Lester Ragay, Sandrex Gainsan at Youth Olympic Games qualifier Angel Polo.
Inangkin ng 5-foot-6 na si Wong ang kanyang ikaanim na sunod na gold medal sa taijijian/taijiquan sa SEA Games noong 2025 edition sa Thailand, habang tinapos ni Inso ang 10-year gold medal drought sa men’s wushu taolu sa nasabi ring biennial event.
Hangad ni Wong na mapaganda ang kanyang bronze medal finish sa Asian Games noong 2018 edition sa Jakarta-Palembang, Indonesia.
May tanso rin siya sa World Cup noong 2016 sa Fuzhou, China.
Ang sanda squad ay binubuo naman nina Carlos Baylon Jr., Xander Alipio, Gideon Fred Padua, Arnel Mandal at Jenifer Kilapio.
Mag-eensayo ang dalawang koponan sa iba’t ibang probinsya sa China sa loob ng dalawang buwan bago sumabak sa Wushu World Cup at sa Asian Games.
- Latest
