ARQ Batch 2001 nakasagunson og daog sa SHAABAA

CEBU, Philippines — Ang ARQ Batch 2001 mikulata sa Magis Medical Services, 93-44, alang sa ikaduha nilang sagunson nga daog sa Division A sa Sacred Heart Ateneo Alumni Basketball Athletic Association (SHAABAA) Season 29 sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Sila si Mark Hing ug Josef Reoma parehong mikadlit og 15 puntos ug pito ka rebounds samtang sila si Erwin Ngo ug Michael Marquez miamot og 10 puntos matag usa sa impresibong pagdemolis sa Batch 2001 sa Magis Medical Services.

Gikan sa mainit nga sinugdanan, 28-12, ang Batch 2001 padayong mikastigo sa ilang kontra hangtud nga miburot ang ilang labaw ngadto sa 53 puntos, 88-35, sa naghinapos nga bahin sa duwa.

Sila si Marlon Abayon ug Raymart Ybañez mi-iskor og 11 puntos matag usa alang sa Magis Medical Services, nga naparot sa ikaduhang higayon.

Sa Division C, ang defending champion Core+ Batch 2018 ug Rufrance LPG Batch 2026 parehong miinat sa ilang rekord ngadto sa 2-1.

Si Lyder Kent Canieso mipabuhagay og 21 puntos uban ang unom ka rebounds, duha ka assists ug usa ka steal aron ibandera ang Batch 2018 ngadto sa 100-57 nga paglampaso sa Batch 2024 samtang si Shawn Harvey Ayuda mipaulbo og 37 puntos uban ang walo ka rebounds, tulo ka assists ug usa ka steal sa dihang gipayaka sa Batch 2026 ang CHEK Technologies Batch 2025, 87-82.

Si Xavier Tarriman misuporta ni Canieso uban ang 17 puntos samtang si Benedict Andre Chua mirehistro og double-double nga 16 puntos ug 12 ka rebounds uban ang upat ka assists ug usa ka steal.

Si Juan Miguel de la Torre maoy laing double-digit scorer alang sa Batch 2018 uban ang 12 puntos, lima ka rebounds ug usa ka assist.

Sa laing bahin, si Ayuda gipaluyohan ni Benj Anthony Chua nga miharos og 13 puntos, 11 ka rebounds, tulo ka assists, lima ka steals ug usa block.

Si Jared Bryce Sumayang nagparamdam sab sa iyang presensiya sa Batch 2026 uban ang 11 puntos ug tulo ka rebounds.

Sa laing sangka sa Division C, si Aldrich Etienne Alvez mirehistro og double-double nga 36 puntos ug 12 ka rebounds uban ang tulo ka assists ug tulo ka steals aron bitaron ang Comforser Tires Batch 2022 ngadto sa 88-66 nga paglampaso sa Batch 2014.

Mikuha sab og atensiyon si Rey Tristan Fuentes bitbit ang 21 puntos, usa ka rebound ug upat ka assists samtang si Robert Mayam mikolekta og 11 punts, 10 ka rebounds, usa ka assist ug upat ka steals aron tabangan ang Batch 2022 pagkulit sa una nilang daog.