Messi mihimo'g kasaysayan sa World Cup

CEBU, Philippines — Ang bangiitang football player nga si Lionel Messi nahimong all-time leading scorer sa World Cup kagahapong adlawa human niya gibitad ang Argentina ngadto sa 32.

Si Messi, nga mitabla sa rekord nga 16 ka goals ni Miroslav Klose sa Germany human siya mikadlit og hat-trick kon tulo ka goals sa 3-0 nilang paglampaso sa Algeria sa miaging semana, mibulsa sa ika-17 ug ika-18 nga goals sa iyang karera sa World Cup atol sa 2-0 nilang pagpayaka sa Austria atubangan sa 70,649 ka tawo nga nagpunsisok didto sa Dallas Cowboys Stadium sa Texas.

Sa wala pa maka-goal sa ika-38 nga minuto, duna untay tsansa si Messi nga mabuak og sayo ang rekord ni Klose.

Apan ang eight-time Ballon D'Or winner nga mag-39 anyos na ugmang adlawa nasipyat sa iyang penalty shot sa ikawalo nga minuto.

Miangkon si Messi nga ang pagkasuko niya sa iyang kaugalingon sa maong sipyat nakapadasig niya nga maka-iskor dili lamang usa apan duha gyud ka goals.

Uban ang lima na ka goals sa ikaduha pa lamang nila nga duwa ning prestihiyosong torneyo nga mahitabo kausa lamang sud sa upat ka tuig, si Messi way duda misemento sa iyang pangan isip labing ngilngig nga football player sa kasaysayan.