Harden, Cavs tanaw na ang East Finals

DETROIT — Humataw si James Harden ng playoff-best 30 points at may 21 markers si Donovan Mitchell para tulungan ang Cleveland Cavaliers na ta­lunin ang Pistons, 117-113, sa overtime at agawin ang 3-2 lead sa kanilang E­astern Conference semifinal series.

Nagdagdag si Max Strus ng 20 points tampok ang anim na three-point shots at may 19 at 16 mar­kers sina Evan Mobley at Jarrett Allen, ayon sa pagkakasunod.

Itinala ng Detroit ang isang 15-point lead sa first half at hinawakan ang 103-94 kalamangan sa huling dalawang minuto ng fourth period.

Nakabangon ang Cle­veland at nakatabla sa 103-103 mula sa dalawang free throws ni Mobley sa huling 45.2 segundo.

Isang 13-0 atake ang ginawa ng Cavaliers kasabay ng pagpapatahimik sa Pistons sa loob ng limang minuto mula sa fourth quarter hanggang sa gitna ng overtime.

Kinuha ng Cleveland ang isang seven-point lead sa 2:39 minuto galing sa three-point shot ni Mitchell.

Idinikit ni Cade Cunningham, umiskor ng 39 points, ang Detroit sa hu­ling 25 segundo mula sa kanyang jumper.

Ang dalawang free throws ni Harden ang sumelyo sa panalo ng Cavaliers na pamamahalaan ang Game 6 bukas kung saan hangad ng fourth-seeded Cavs na makasagupa ang New York Knicks sa East finals.

Kung mananalo ang top-seeded Pistons ay sila ang magho-host sa Game 7 sa Lunes.

Nag-ambag si Daniss Jenkins ng 19 points at may 13 markers si Tobias Harris.