UAAP crown ibabalik na ng La Salle sa Taft
MANILA, Philippines — Puntirya ng De La Salle University na sikwatin ang korona pagharap nila sa defending champion National University sa Game 2 ng UAAP Season 88 women’s volleyball tournament na lalaruin sa SM Mall of Asia Arena sa Pasay City ngayong araw.
Magsisimula ang paluan ng bola sa pagitan ng Lady Spikers at Lady Bulldogs sa alas-5 ng hapon, pero bago ang ratratan ay magkakaroon muna ng women’s awarding ceremony sa alas-4 ng hapon.
Hindi pa nakakatikim ng kabiguan ang Taft-based squad sa 15 na laro kasama ang 14-game elimination round, at dahil nagwagi ang DLSU sa Game 1 ng kanilang best-of-three finals ay namumuro na maibalik ang korona sa kanilang bakuran.
Winalis ng La Salle ang NU, 25-23, 25-18, 25-18 noong Miyerkules matapos nilang sandalan sa opensa sina Angel Canino at Shevana Laput.
Tumikada si Canino ng 17 points mula sa 15 kills at tig-isang block at service ace para sa last year’s runner-up, La Salle kaya asahang siya pa rin ang magiging pangunahing armas ni head coach Ramil De Jesus.
“Wala nang ibang gagawin, basta kami, kung ano ‘yung ginawa naming preparation, tuloy lang. Alam naman namin na ‘yung NU hindi nababago galaw nila matalo, manalo iisa lang yung galaw, beterano ‘yung setter and ‘yung mga spikers nandoon naman hindi masasabing mahina even yung mga second stringers nila puwede mo gamitin malakas talaga e. So talagang maganda yung pinakita ng NU,” wika ni De Jesus.
Maliban kina Canino at Laput, huhugot din ng puwersa si De Jesus kina Amie Provido at Mary Shane Reterta, na nag-ambag ng 12, 11 at 11 markers, ayon sa pagkakasunod sa kanilang huling laban.
Muling sasandal sa opensa si NU mentor Regine Diego kina Arah Ella Panique, Sam Cantada at Evangeline Alinsug upang makahirit ng do-or-die Game 3.
- Latest
