Lady Bullpups walang dungis sa Pool A ng SGVIL

MANILA, Philippines — Dinomina ng defending champion National University Nazareth School ang Bethel Academy, 25-12, 25-12, para kumpletuhin ang sweep sa Pool A ng Shakey’s Girls Volleyball Invitational League (SGVIL) Rising Stars Cup Division 1 na nilaro sa La Salle Green Hills Gym, Lunes.

Kinapitan ng Lady Bullpups ang matikas na laro ni Raine Alonzo para ilista ang 4-0 win-loss record kaya asahang dadalhin nila ang momentum sa knockout quarterfinals.

“Masaya po na nakapasok kami sa quarterfinals na walang talo. Lahat po pinaghirapan namin may kinalabasan,” sabi ni Alonzo na umiskor ng eight attack points.

Bumakas si Bella Cruz ng six markers habang sina Jhayna Bulandres at Diza Berayo ay umiskor ng tig-limang puntos para sa NUNS na haharapin ang St. John’s Institute sa Last 8 bukas (Miyerkules).

Walang kahirap-hirap din na pinagulong ng Far Eastern University-Diliman ang San Felipe Neri Catholic School, 25-16, 25-18 kaya malinis din sila sa apat na laro sa Pool C.

Makakatapat ng Baby Lady Tamaraws ang Pool B second seed Immaculada Conception College sa quarterfinals sa event na mapapanood sa live and on-demand via PusoP.com livestream at Solar Sports.

Samantala, sinilo ng King’s Montessori ang huling quarters seat sa Pool A matapos nitong patalsikin ang inaugural champion California Academy, 25-17, 25-21 sa tournament na suportado ng Shakey’s Pizza Parlor, Peri-Peri Charcoal Chicken, Potato Corner at R and B Milk Tea.

Kinamada ni Sharina Lleses ang 11 points para sa King’s Montessori na umabante sa knockout stage at nakatakdang harapin ang unbeaten University of Santo Tomas.

Sa Division 2, nakapagtala ang Corpus Christi School ng 5-0 karta sa Pool E matapos hablutin ang 25-22, 25-19 panalo kontra Miriam College.