Philippines beach volley teams mapapalaban sa ABG

MANILA, Philippines — Mapapalaban ang beach volleyball teams ng Pilipinas sa 6th Asian Beach Games na magsisimula ngayong araw sa Sanya Bay sa China.

Hawak nina PH-1 tandem Sunny Villapando at Grydelle Joanice Matibag ang No. 9 seed sa event kung saan pasok ang dalawa sa Pool H kasama ang Mongolia, Macau at Kazakhstan.

Aariba naman ang PH-2 pair nina Khylem Progella at Sofia Pagara bilang No. 10 seed sa Pool G kasama ang Kazakhstan-2, Uzbekis­tan at Macau-2.

Walong pools ang men’s at women’s divisions kung saan ang dalawang mangungunang teams sa bawat pool ang aabante sa knockout rounds.

Ipaparada ng host China ang solidong lineup nito sa pangunguna nina Beach Pro Tour Haikou champions Dong Jie at Jiang Kaiyue sa Pool A habang aariba naman sina Japanese bets Ren Matsumoto at Non Matsumoto sa Pool B.

Babandera sina Chinese spikers Zhou Mingli at Halaiti Kadeliye sa Pool C.

Lalarga rin sa women’s division ang teams mula sa Chinese Taipei, Lebanon, Malaysia, Syria, Maldives, Uzbekistan at Mongolia.

Masaya si Asian Volleyball Confederation (AVC) president Ramon “Tats” Suzara sa pagbabalik ng Asian Beach Games matapos ang ilang taon na pagkakaantala.

“Since I have been elected as AVC President in 2024, elevating beach volleyball has been my absolute top priority, fulfilling the exact promise I made during my campaign. We have focused heavily on backing more host cities, providing vital platforms for our athletes, and pushing the sport toward true professionalism across Asia,” ani Suzara.

Gaganapin ang continental championship sa Shangluo, China sa Set­yembre na isa sa magiging daan para makapasok sa Los Angeles 2028 Olympics.