Jazz naisahan ng Celtics
SALT LAKE CITY — Kumamada si Derrick White ng 27 points, 7 rebounds, 6 assists at career-high 7 blocks para banderahan ang Boston Celtics sa 129-119 panalo sa Utah Jazz.
Nagdagdag si Jaylen Brown ng 23 markers at 10 assists para sa Celtics (20-12) habang may 20 at 18 points sina Anfernee Simons at Payton Pritchard, ayon sa pagkakasunod.
Umiskor si Keyonte George ng 37 points sa panig ng Jazz (12-20) at may 26 markers si Jusuf Nurkic.
Bumangon ang Celtics mula sa mga double digit deficit sa first quarter bago nakalapit sa halftime, 59-64.
Sa pangunguna ni White ay umiskor ang kanyang tropa ng 40 points sa kabuuan ng third period para makawala sa Jazz sa fourth canto.
Sa kabuuan ng second half ay tumipa ang Boston ng 70 points at nilimitahan ang Utah sa 55 markers para sa kanilang bounce back win.
Sa Memphis, isinalpak ni rookie guard VG Edgecombe ang isang three-point shot sa huling 1.7 segundo para tulungan ang Philadelphia 76ers sa 139-136 overtime win sa Grizzlies.
Humataw sina Tyrese Maxey at Joel Embiid ng tig-34 points para sa Philadelphia (17-14) habang tumapos si Edgecombe na may 13 points.
Binanderahan ni Ja Morant ang Memphis (15-18) sa kanyang 40 points, kasama ang 18 sa fourth period at humakot si Cedric Coward ng mga career-highs 28 points at 16 rebounds.
Kinuha ng 76ers ang 103-100 abante papasok sa fourth period, samantalang ang dalawang triple at drive ni Edgecombe ang naglayo sa kanila sa 124-118.
- Latest
