EDITORYAL - Anti-political dynasty

Sumala pa sa survey sa Pulse Asia, “small majority” lamamg sa populasyon ang gusto gyung dalion pagpasar ang anti political dynasty bill diha sa kongreso.

Unya ang pinakagamay lang og nisuporta sa maong balaudnon, gikan didto sa Mindanao. Masabtan kini kay dihang dapita daghang mga impluwensiyadong pamilya ang naghari sa politika, usa na niini ang pamilyang Duterte sa Davao.

Kadaghanan sa populasyon o 54 porsiyento ang gustong pasaron og dali  ang maong balaudnon.

Ang mayoriya niini o 69 porsiyento gikan sa Metro Manila,  59 porsiyento sa gipangutana sa ubang bahin sa Luzon, 59 porsiyento sab gikan sa Visayas, uh 57 porsiyento sa gitawag og Class D.

Apan didto sa Mindanao, nabahin og katulo ang opinyon sa mga tawo bahin ani, 34 porsiyento ang gusto, 38 porsiyento ang dili pa sigurado ug 27 porsiyento ang dili gustong papasaron ang maong balaudnon.

Mismo si President Ferdinand Marcos Jr. Maoy miawhag sa kongreso nga himuong prayoridad ang pagpasar niini. Ang pamilyang Marcos usa mga dakong political dynasties dinhi sa nasud.

Apan daw giyam-iran lang kini kay ang dapat unta “ urgent” ug dili lang priority ang mando sa presidente.

 Kung pananglitan matuki na kini sa Kongreso, papasaron kaha ni sa mga pamilya sa mga politiko?

Kay sa pagkakaron dunay mga managsuon, magtiayon, mag- agaw, pag-umangkon, anak, amahan o inahan ang pulos naglingkod sa kongreso.

Mosugot kaha sila nga sa sunod eleksyon, usa nalang nila ang makadagan sa maong posisyon?

Kining political dynasty sa Pilipinas usa kini sa dakong tinubdan sa kurapsyon sa halos tanang butang sa panggobiyerno.