Villegas sasargo ng gold sa boxing

MANILA, Philippines — Hindi makukuntento si 2024 Paris Olympic bronze medalist Aira Villegas sa pagpasok lamang sa finals ng women’s flyweight (50 kilogram) division sa 33rd Southeast Asian Games kahapon sa Thailand.

Determinado siyang suntukin ang gold medal para idagdag sa nahahakot ng Team Philippines sa biennial event na magtatapos sa Disyembre 20.

“Tapos na yung pa­ngarap ko para sa sarili ko, which is makapag-Olympics, but for my country, hindi pa natatapos,” ani Villegas matapos dominahin si Mya Moe Thu ng Myanmar via unanimous decision sa kanilang semifinal bout sa Chulalongkorn University Sports Center.

Dahil dito ay nakatiyak na ang 30-anyos na tubong Tacloban, Leyte ng silver medal kagaya nina Jay Bryan Baricuatro (men’s -48kg) at Flint Jara (men’s -54 kg).

Makakatapat ni Villegas para sa gold medal ang sinumang mananalo sa semifinal fight nina Chuthamat Raksat ng Thailand at Israelah Athena Bonita Saweho ng Indonesia.

Sa kanyang pagsa­lang sa 2019 Manila SEA Games ay bronze ang nasuntok ni Villegas sa kampanya sa bantamweight class.

Samantala, haharapin ni Baricuatro para sa gintong medalya si Thai boxer Thitiwat Phlongaurai, habang makakatapat ni Jara si hometown bet Thanarat Saengpet.

Nakuntento sa tanso sina Olympics silver meda­list Nesthy Petecio at Olympian Hergie Bacyadan.