Colombia, Argentina bakbakan sa quarterfinals
MANILA, Philippines — Magbabakbakan ang Colombia at Argentina sa quarterfinals ng FIFA Futsal Women’s World Cup ngayong gabi sa Philsports Arena sa Pasig City.
Aarangkada ang salpukan ng Colombia at Argentina sa alas-6 ng gabi na susundan ng duwelo ng Spain at Morocco sa alas-8:30 ng gabi.
Nakapasok sa quarterfinals ang Colombia matapos ilampaso ang Thailand sa pamamagitan ng 4-1 demolisyon para masiguro ang huling silya sa Group B.
Bumandera sa ratsada ng Colombia si team captain Merlin Salcedo na nagtala ng dalawang goals — sa ikawalong minuto at ika-23 minuto ng laro.
Nagdagdag naman ng tig-isang goal sina Diana Celis sa ikaapat na minuto at Danna Rodriguez sa ika-35 minuto para dahiln ang Colombia sa panalo.
Tinapos ng Colombia ang group stage tangan ang anim na puntos mula sa dalawang panalo at isang talo para makuha ang No. 2 spot sa Group B.
Nanguna naman ang Spain na may malinis na 3-0 rekord para sa siyam na puntos.
Dalawang silya na lamang sa quarterfinals ang natitira.
Paglalabanan ito ng Japan at Tanzania sa Group C at ng Iran at Italy sa Group D. Pasok na sa quarterfinals ang Portugal at Brazil.
- Latest
