1-0 lead pag-aagawan ng NU at UST sa SSL Unity Cup Finals
MANILA, Philippines — Haharapin ng ‘four-peat’ seeking National University ang palaban na University of Santo Tomas sa Game One ng 2025 Shakey’s Super League (SSL) Preseason Unity Cup best-of-three championship sa Rizal Memorial Coliseum.
Nagtapat na sa finals ang Lady Bulldogs at Golden Tigresses noong 2023 edition at muli silang magbabanatan para mag unahan sa unang panalo sa alas-4 ng hapon.
Naisagawa ang finals rematch ng NU at UST matapos nilang patalsikin ang mga nakatunggali sa semifinals sa event na katuwang ang Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Kahit kulang sa matinding armas, nagawa pa rin ng Lady Bulldogs, ang National Invitationals Davao Leg winner, na kalusin ang Far Eastern University Lady Tamaraws, 25-20, 27-25, 25-21, sa semis.
“Itong game na ito is very important for us para may madala kami paangat sa finals,” sabi ni NU winger Celine Marsh matapos ang panalo sa FEU.
Maliban kay Marsh, huhugot din ng puwersa ang Lady Bulldogs kina skipper Vange Alinsug, rookie Sam Cantada at Denesse Daylisan na galing sa national team tour of duty.
Ang iba pang sandata ni NU head coach Regine Diego na gagamitin ay sina setter Lams Lamina, Chams Maaya, Alexa Mata, Josline Salazar at libero Shaira Jardio.
Para sa UST, tinalo naman nila ang Adamson University, 25-22, 25-22, 25-20, sa Final Four.
- Latest
