Aguila sumipa ng silver sa AYG poomsae
MANAMA, Bahrain — Sumipa si Kristen Ambriel Aguila ng silver medal sa pagsisimula ng kampanya ng Philippine taekwondo team sa 3rd Asian Youth Games Huwebes dito.
Minalas ang 15-anyos na si Aguila sa kanilang gold medal match ng mas matangkad na si Iranian Zeinab Shahriari, 120-124, sa girls’ individual recognized poomsae sa Exhibition World Bahrain Hall 2.
Nauna nang umiskor si Aguila ng 118.4-118.1 panalo kay Yuqi Li ng China sa semifinals.
Bago ito ay dinaig muna ni Aguila, kumuha ng dalawang gold medals sa 2024 World Taekwondo Grand Slam Youth League sa Wuxi, China, si Datkaiym Aibekova ng Kyrgyzstan sa quarterfinals, 114-111.
Binuksan niya ang kampanya sa pamamagitan ng panalo kay Suha Rayefa Syeed ng Bangladesh sa Round-of-16.
Noong 2013 edition ng AYG ay nag-uwi ng gold si Pauline Lopez sa Nanjing, China, habang may ambag na silver si Francis Aaron Agojo.
Samantala, talo si Caleb Angelo Calde kay Iranian Behdad Naghiee sa quarterfinals ng boys’ individual recognised poomsae.
Malas din sina Alfonzo Gabriel Tormon at Angel Lyn Yvainne Dacanay sa quarterfinals ng Mixed Pair Recognized Poomsae laban kina Thai pair Suchanang Injang at Nitikon Yimprasert, 8.5000-8.4300. (POC Pool)
- Latest
