Yulo out sa Thailand SEA Games
MANILA, Philippines — Hindi masisilayan sa aksyon si Paris Olympics double gold medalist Carlos Yulo sa 2025 Southeast Asian Games na gaganapin sa Bangkok, Thailand sa Disyembre.
Isa sa pangunahing dahilan ni Yulo ang bagong patakaran na ipatutupad ng Thailand SEA Games organizing committee kung saan isang event lamang ang maaaring lahukan ng isang atleta sa gymnastics competition.
Nais din ni Yulo na mabigyan ng tsansa ang mga teammates nito sa national team na sumabak sa SEA Games.
Suportado naman ni Gymnastics Association of the Philippines (GAP) president Cynthia Carrion ang desisyon ni Yulo.
“They’re giving only one apparatus. If they give Carlos all, he’s going to win all the apparatus for sure. So they’re giving him only one,” ani Carrion sa isang panayam nito.
Malakas sana ang tsansa ni Yulo lalo pa’t dalawang gintong medalya ang nasungkit nito sa Paris Olympics noong nakaraang taon — ang men’s floor exercise at vault events.
Matikas din ang laban nito sa iba pang apparatus gaya ng still rings, horizontal bar, parallel bars at individual all around.
Si Yulo ang reigning champion sa SEAG sa all-around at parallel bars na pinagharian nito noong 2023 edisyon sa Cambodia.
Nakaginto rin si Yulo sa still rings, vault, floor exercise, horizontal bar at all-around noong 2021 Vietnam SEAG.
Sa ngayon, sesentro muna ang atensiyon ni Yulo sa 53rd Artistic Gymnastics World Championships na ginaganap sa Indonesia Arena sa Jakarta, Indonesia.
Target ni Yulo na makapasok sa final round ng apparatus.
Kailangan ni Yulo na makuha ang Top 8 para umabante sa finals na idaraos naman sa Oktubre 24 at 25.
- Latest
