Dyip wasak sa Bossing
MANILA, Philippines — Nagpasabog si Christian David ng 24 points para banderahan ang Blackwater sa 107-87 paggiba sa Terrafirma sa PBA Season 50 Philippine Cup kahapon sa Ynares Center sa Motalban, Rizal.
Iniskor ng 6-foof-6 wingman ang 18 markers sa first half kung saan kinuha ng Bossing ang 50-42 halftime lead patungo sa pagpapatumba sa Dyip.
Tumipa si point guard RK Ilagan ng 22 points,10 rebounds at 4 steals, habang nag-ambag si No. 3 overall pick Dalph Panopio ng 13 markers.
“Of course, we’re very happy and we got the job done today,” ani Blackwater coach Jeffrey Cariaso. “You wanna always try to start on a good note, and today is a good first step.”
Hindi naglaro si Fil-Am guard Sedrick Barefield dahil sa shoulder injury.
Nadiskaril naman ang coaching debut ni dating PBA guard Ronald Tubid para sa Terrafirma.
Huamataw ang Bossing sa third quarter para magposte ng double digit lead bago ilista ang 90-72 bentahe sa 6:33 minuto ng fourth period.
Ang drive, three-point play at four-point shot ni Ilagan ang tuluyan nang nagbaon sa Dyip sa 107-85 sa natitirang 24.5 segundo.
Pinamunuan ni Jerrick Ahanmisi ang Terrafirma sa kanyang 25 points tampok ang anim na triples.
Nagdagdag si Paolo Hernandez ng 19 markers at may 12 points si Louie Sangalang.
- Latest
