Negrito aasahan ng De Guzman-less Creamline

MANILA, Philippines — Bagama’t hindi pa rin maglalaro si veteran setter Jia De Guzman para sa 2025 Premier Volleyball League (PVL) Reinforced Conference ay kumpiyansa pa rin ang Creamline sa kanilang tsansa sa playoffs.

Nagdesisyon ang Cool Smashers management na huwag munang isalang ang 30-anyos na si De Guzman sa torneong magbubukas sa Martes.

Ayon kay coach Sherwin Meneses, muli nilang aasahan si setter Kyle Negrito na pumalit sa 30-anyos na si De Guzman simula nang maglaro ang huli sa Japan SV.League para sa Denso Airybees.

“Siyempre iba si Jia, talaga tested na sa mga game. So, ‘yung panghihinayang, siyempre laging nandiyan ‘yan,” ani Meneses kay De Guzman. “Big factor talaga kung makalaro sa amin si Jia, pero siguro hindi pa ngayon. Siguro by next year.”

Huling naglaro si De Guzman para sa Creamline noong 2023 PVL Invitational Conference bago kinuha ng Denso Airybees sa Japanese league.

“I think the management has decided also na she has to sit the conference out. So, she’s not playing this conference,” wika ni team captain Alyssa Valdez kay De Guzman.

Ang eight-time PVL Best Setter ang gumagabay din sa Alas Pilipinas na sasabak sa darating na 33rd Southeast Asian Games sa Thailand sa Disyembre.

Kinuha ng Cool Smashers si American spiker Courtney Schwan para sa kanilang pagdedepensa sa korona ng Reinforced Conference.

“Coco is such a good addition to our team. More than the experience she’s bringing, she’s very vocal and very straightforward,” sabi ni Valdez kay Schwan.