RHJ-less Jordan lalabanan ng Gilas sa tune-up game
MANILA, Philippines — Magpapambuno sa isang rematch ang Gilas Pilipinas at Jordan na wala muna sa eksena ang karibalang Justin Brownlee at Rondae Hollis-Jefferson.
Bilang bahagi ng kanilang preparasyon para sa 2025 FIBA Asia Cup ay maghaharap sa isang tune-up game ang Gilas at Jordan ngayon sa Jeddah sa Saudi Arabia subalit hindi si Hollis-Jefferson ang kanilang magiging naturalized player.
Ito ang sinabi ni Gilas coach Tim Cone bagama’t wala pang final roster ang Jordan at dahil na rin sa commitment ni Hollis-Jefferson bilang resident import ng TNT Tropang 5G sa PBA sa buong taon.
Kasama si Hollis-Jefferson sa unang 24-man pool ng Jordan subalit hindi siya sumali sa kanilang training camp at sa halip ay naglagi sa Pilipinas para suportahan ang TNT sa 2025 PBA Philippine Cup Finals at para sa kanyang “RHJ on Tour” na basketball clinic.
Si Dar Tucker, ang long-time import ng koponan, ang hahalili sa naturalized player spot ng Jordan.
Wala namang nabago sa Gilas na sasandal pa rin kay Brownlee.
Matatandaang dinaig ni Brownlee si Hollis-Jefferson nang gabayan sa 70-60 panalo ang Gilas sa 2023 Asian Games para wakasan ang 61 taong pagkauhaw ng Pilipinas sa gintong medalya ng prestihiyosong continental tourney.
Aakbay kay Brownlee sina June Mar Fajardo, Calvin Oftana, Scottie Thompson, Dwight Ramos, CJ Perez, Chris Newsome, Carl Tamayo, Kevin Quiambao, Japeth Aguilar, Jamie Malonzo at AJ Edu.
Kontra sa Jordan ang final tune-up match ng Gilas matapos ang 103-98 panalo kontra sa Macau sa Pilipinas para maghanda sa bigating duwelo kontra sa New Zealand, Iraq at Chinese Taipei sa Group D ng Asia Cup.
Mapapalaban naman sa Group C ang Jordan kasama ang China, India at host na Saudi Arabia.
- Latest
