AFAD Arms Show lalarga sa July 23

MANILA, Philippines — Muling aarangkada ang Association of Firearms and Ammunition Dealers of the Philippines, Inc. (AFAD) Defense and Sporting Arms Show na gaganapin sa Hulyo 23 hanggang 27 sa SMX Convention Center sa Pasay City.

Asahang daragsa ang mga gun enthusiasts, sports shooters at industry stakeholders sa naturang event dahil walang naganap na programa sa nakalipas na anim na buwan dahil sa election gun ban.

Kaya naman sabik na ang lahat sa pagbabalik nito kung saan maraming mga bagong itatampok sa edisyong ito.

Patuloy ang paglaki ng mga shooting sports kaya’t kasama sa programa ng AFAD ang pagbibigay ng kaalaman para sa responsible gun ownership.

Ilalabas sa event ang mga bagong firearms, ammunition at tactical gear kasama na ang mga bagong industry innovations mula sa mga pangunahing dealers at manufacturers sa bansa.

Sinabi ni AFAD spokesperson Alaric Topacio na patuloy din ang paglaki ng mga sumusuporta sa local shooting community at industry.

“This year’s show reflects the energy and progress in the firearms industry, and it’s especially timely as we prepare to host major international competitions. It’s an opportunity to bring our community together and continue promoting responsible firearms ow­nership,” ani Topacio.

Suportado rin ng AFAD ang pagdaraos ng 2nd IPSA Action Air World Championship na gaganapin naman sa Hulyo 26 hanggang Agosto 3 sa Iloilo City tampok ang mahigit 200 shooters mula sa 40 bansang darating.

Sariwa rin ang Pinoy shooters sa matagumpay na kampanya sa 2025 IPSC PCC/Mini Rifle World Shoot sa Znojmo, Czech Republic kung saan humakot ng ginto ang tropa.

Kabilang sa lalahok sa exhibit ay ang Trust Trade, PB Dionisio & Co. Inc., Squires Bingham International Inc., Twin Pines Inc. (Tactical Corner), Nashe Enterprises, Hahn Manila Enterprises, Shooters Guns and Ammo Corp., Metro Arms Corporation, R. Espineli Trading, Imperial Guns, Ammo & Accessories, Jethro International Inc., Stronghand Incorporated, Final Option Trading Corporation, Force Site Inc. at Lynx Firearms and Ammunition at iba pa.