Jerusalem WBC champ pa rin

MANILA, Philippines — Inilabas ni reigning World Boxing Council (WBC) minimumweight champion Melvin Jerusalem ang bagsik nito upang talunin si Japanese fighter Yudai Shigeoka via unanimous decision sa kanilang rematch na ginanap sa Aichi Sky Expo sa Tokoname, Japan.

Dahil sa matikas na ratsada mula umpisa hanggang dulo ng bakbakan, nakuha ni Jerusalem ang boto ng tatlong hurado na nagbigay ng 118-110, 116-112, at 119-109 iskor pabor lahat sa Pinoy pug.

Matibay ang Japanese pug kung saan sinubukan ni Jerusalem na pabagskin ito sa ilang mga naunang rounds.

Ngunit masuwerte si Shigeoka na natapos nito ang laban at matakasan ang mga solidong kumbinasyon na pinakawalan ni Jerusalem.

Umangat ang rekord ni Jerusalem sa 24-3 tampok ang 12 knockouts habang bagsak naman si Shigeoka sa 9-2 marka.

Una nang tinalo ni Jerusalem si Shigeoka sa kanilang unang paghaharap noong nakaraang taon via split decision.

Ito ang ikalawng title defense ni Jeruslem.

Una na noong Setyembre na ginanap sa Mandaluyong City kung saan naitarak ni Jerusalem ang unanimous decision win kontra kay Luis Castillo ng Mexico.

Wala pang linaw kung sino ang sunod na makakalaban ni Jerusalem para sa kanyang susunod na title defense.