Tatay Rudy’s misakmit sa ikatulong titulo sa UP Cebu Alumni caging

CEBU, Philippines — Ang Tatay Rudy’s nakaipsot sa U.P. Legends, 48-46, aron paglugwa nga kampiyon sa University of the Philippines Cebu Alumni Basketball League Season 4 “Tunob Cup” didto sa UP Cebu High School gym ning bag-ohay pa lamang.

Ang  Tatay Rudy’s, nga gipaluyohan nilang Jason Arquisola sa ARQ Builders ug Talisay City Mayor Samsam Gullas, wala mopa-iskor sa Legends sa katapusang kuwatro minutos dayon na ngadto sa pagbira sa ikatulo nilang korona sud sa upat ka seasons sa liga uban ang perpektong 10-0 rekord.

Human sa duha ka krusyal nga free throws nilang season ug Finals MVP Donald Guia ug Geneking Mercader nga nakapasikit sa Tatay Rudy’s ngadto sa usa na lang ka lugas, 45-46, puyde pa untang inaton sa Legends ang ilang labaw apan si Michael Wong nasipyat sa duha niya ka free throws sa pinal nga nuybe segundos.

Si Mercader milangkat sa rebound dayong pasa sa bola ngadto ni Gilbeys Cabrera, nga nakasigpat sab dayon sa libre kaayong si Jonas Panerio.

Wala na mag-usik pa og oras, si Panerio mipasud sa iyang layup gawas nga nakapasol pa og foul sa nahibilin nga tres segundos sa makutas ug kulbahinam nga sangka.

Si Panerio kalmado kaayong milansang sa iyang bonus free throw aron pagpa-abante sa Tatay Rudy’s og dos puntos, 48-46.

Duna pa untay tsansa ang Legends apan igo lamang mihawok sa kilid sa backboard ang desperasyon ilang tira.   

Si Guia, nga naapil sab sa Mythical 5, maoy nangu sa Tatay Rudy's uban ang 14 puntos, 10 ka rebounds, tulo ka assists ug usa ka steal. Si Panerio mihipos og siyete puntos, tulo ka rebounds ug tulo ka steals samtang si Mercader midugang og sayes puntos ug walo ka rebounds.

Sa laing bahin, ang Lethals mipayaka sa DosMil, 92-81, aron pag-angkon sa ikatulong puwesto.