Magis Eagles buot tapuson ang Baby Jaguars

CEBU, Philippines — Ang three-time defending champion Sacred Heart School-Ateneo de Cebu (SHS-AdC) Magis Eagles naglaraw og kasaysayan sa dihang suwayan nila nga tapuson ang University of San Jose-Recoletos (USJ-R) Baby Jaguars sa Game 2 sa best-of-three Cebu Schools Athletic Foundation, Inc. (CESAFI) Season 24 basketball finals karong adlawa (Biyernes, Disyembre 6) diha sa Cebu Coliseum.

Luyo sa 65-45 nilang demolisyon sa Baby Jaguars sa pasiunang duwa sa serye duha ka gabii ang milabay, ang Magis Eagles nanginahanglan na lang og usa ka daog aron mamahimong labing unang high school team nga nakalangkat og upat ka sagunson nga korona sa 24 ka tuig nga kasaysayan sa liga.

Mahimong maangkon sa Magis Eagles ang talagsaong dungog kon ugaling ilang mausban og parot ang Baby Jaguars sa ilang sangka sa alas-6 sa gabii.

Kon ugaling molampus, ang Magis Eagles ni coach Rommel Rasmo mobira sab sa rekord isip labing daogan nga juniors squad sa CESAFI nga kasamtangan nilang gisaw-an uban sa University of the Visayas (UV) Baby Lancers bitbit ang pito ka tropeyo sa kampiyonato matag usa.

Ang Magis Eagles angayan hinoon nga mangandam alang sa usa ka gubat gumikan kay ang Baby Jaguars gipaabot nga molusad og madasigong resbak sa tinguha nga makapuwersa og tinagakay nga duwa ingon man buhion ang ilang paglaum nga bisbisan ang 22 ka tuig nilang huwaw sa titulo.