Gin Kings 2-1 na, E-Painters miresbak

CEBU, Philippines — Si Justin Brownlee mikuha og atensiyon sa dihang gipayaka na sab sa Barangay Ginebra ang San Miguel Beer, 99-94, aron pagposte og 2-1 nga bentaha sa ilang best-of-seven PBA Governors' Cup semifinals niadtong Dominggo, Oktubre 13, didto sa Dasmarinas City Arena sa Cavite.

Mangtas kaayo si Brownlee nga miharos og 30 puntos, siyam ka rebounds, lima ka assists ug lima ka blocks aron tabangan ang Gin Kings pagkontrolar og balik sa serye.

Dako sab og naambag sila si Japeth Aguilar, Maverick Ahanmisi, ug Stephen Holt ingon man sila si RJ Abarrientos ug Scottie Thompson.

Si Aguilar mipupo og 22 puntos ug walo ka rebounds, samtang si Ahanmisi mihipos og 15 puntos ug 11 ka rebounds ug labaw sa tanan ang duha niya ka free throws sa pinal nga 12 segundos maoy nagsilyo sa daog sa Gin Kings. Wala sab magpabitin si Holt nga miamot og 11 puntos, pito ka rebounds, ug pito ka assists.

Sa laing bahin, si Aaron Fuller namawi gikan sa mabugnaw niyang salida sa miagi nilang duwa aron pangulohan ang Rain or Shine Elasto Painters ngadto sa 110-109 nga kadaogan batok sa TNT Tropang Giga nga nakalikay kanila gikan sa pagkalubong ngadto sa 0-3 nga kawot.

Si Fuller mikolekta og 26 puntos, apil na iyang 3-point play sa katapusang 3.8 segundos nga maoy nag-aswat sa E-Painters ngadto sa makapaisa'g balahibo nga kadaogan. Milangkat sab siya og 16 ka rebounds aron tabangan ang E-Painters pagputol sa labaw sa TNT ngadto na lang sa 2-1 sa ilang serye. (BANAT NEWS)