Baby Lancers 3-0 na sa CESAFI

Webmasters midominar sa Jaguars

CEBU, Philippines — Ang University of Cebu (UC) Webmasters mipayaka sa University of San Jose-Recoletos (USJ-R) Jaguars, 76-58, alang sa ikaduha nilang sunod-sunod nga daog sa Cebu Schools Athletic Foundation, Inc. (CESAFI) Season 24 basketball tournament niadtong Domingo, Oktubre 6, didto sa Cebu Coliseum.

Si Danie Boy Lapiz mitagak og 21 puntos uban ang lima ka rebounds ug usa ka block samtang si Jasper Pacaña miamot og 13 puntos, duha ka rebounds, ug duha ka assists alang sa Webmasters nga nagkigduyog sa two-time defending champion University of the Visayas (UV) Green Lancers ug Benedicto College (BC) Cheetahs sa kinatas-ang bahin sa college division standings bitbit ang parehong 2-0 rekords. Sila si Luther Gabriel Leonard ug Mc Stevel Ursal nagparamdam sab pinaagi sa pagkumbinar og 19 ka rebounds hinungdan nga gilupig sa Webmasters ang Jaguars ning departamento, 54-43.  Gikan sa 43-23 nga bentaha sa halftime, ang Webmasters mibulhot pa ngadto sa 27 puntos labaw, 51-24, sa sayong bahin sa ikatulong kuwarter nga nakapabarag sa Jaguars sa nahibiling bahin sa duwa.

Si Elmer Echavez Jr. mihipos og 14 puntos, siyam ka rebounds, usa ka assist ug duha ka steals alang sa Jaguars nga nahagba sa ikaduhang higayon sud sa tulo ka sinugdanan.

Sa high school level, UV Baby Lancers nakabawi human nabiyaan og 11 puntos, 33-44, sa sayong bahin sa ikatulong kuwarter ug dayon nakasugakod sa madasigong kumbati sa USJ-R Baby Jaguars sa endgame aron pag-ipsot ngadto sa 73-70 nga kadaogan.

Si Roderick Cambarijan Jr. mipupo og 19 puntos, unom ka rebounds, tulo ka assists ug tulo ka blocks samtang si John Nathan de la Torre mitimbre og 16 puntos, lima ka rebounds ug duha ka assists alang sa Baby Lancers, nga nakigsawo na karon sa liderato sa juniors division uban sa UC Baby Webmasters bitbit ang managsamang 3-0 nga baraha.

Alkansi lamang og tres puntos, 67-70, sa pinal nga usa ka minuto sa kulbahinam nga aksiyon, ang Baby Jaguars wala makapahimus sa pipila nila ka tansa nga piogon ang Baby Lancers sa dihang si Kyle Mathew Barietta mipasud lamang og usa sa tulo niya ka free throws sa katapusang 27 srgundos ug dayon si J Lord Pepito wala makapasud sa libre kaayo niyang layup sa nahibilin nga 10 segundos Si De la Torre naka-igo lamang og tulo sa unom niya ka free throws sa pinal nga 16 segundos aron igo na kini aron ang Baby Lancers magpabiling way pilde.

Sa laing bahin, ang bag-ohanon sa liga nga BC Baby Cheetahs mipakurat sa University of San Carlos (USC) Baby Warriors, 65-59, alang sa makasaysayanon nilang daog sa CESAFI.

Si Joshua Allen Micaros nagmangtas aron pagrehistro og double-double nga 22 puntos ug 18 ka rebounds samtang sila si Joseph Carl Demaclid ug Kyle Andre Nalisa nagkumboya'g 32 puntos, siyam ka rebounds ug upat ka assists aron tabangan ang Baby Cheetahs pagpakgang sa upat ka sagunson nilang malas.

Sa laing resulta,  si Froilan Maglasang mi-iskor og 16 puntos samtang si Jelomar Rota mitali og 15 sa dihang ang two-time defending champion Sacred Heart School-Ateneo de Cebu (SHS-AdC) Magis Eagles milampaso sa Cebu Roosevelt Memorial Colleges (CRMC) Baby Mustangs, 97-66, alang sa ikaduha nilang sagunson nga daog human mapilde sa una nilang duwa batok sa Baby Jaguars.