TNT silat sa 4-pointer ni Hopson

MANILA, Philippines — Matapos si Chris Banchero ng Meralco ay si Converge import Scotty Hopson naman ang gumawa ng PBA history.

Isinalpak ni Hopson ang kauna-unahang game-winning four-point shot sa huling 3.6 segundo para itakas ang FiberXers kontra sa TNT Tropang Giga, 96-95, sa PBA Season 49 Governors’ Cup sa Smart Araneta Coliseum.

Tumapos si Hopson na may 32 points, kasama rito ang dalawang 4-pointers, bukod sa 10 rebounds at 4 assists sa 2-1 record ng Converge katabla ang TNT sa Group A.

“In situations like that I get real calm, I get real confident and I just let my instincts take over,” ani Hopson. “I made shots like that my whole career in terms of game winners. So this is just another one that went in.”

Nagdagdag si Schonny Winston ng 14 markers para sa FiberXers at may 13, 12 at 10 points sina Justin Arana, Kevin Racal at Alex Cabagnot, ayon sa pagkakasunod.

Pinamunuan ni import Rondae Hollis-Jefferson ang Tropang Giga sa kanyang 32 points kasunod ang 22 markers ni Calvin Oftana.

Matapos ang dalawang free throws ni Hollis-Jefferson sa huling 9.6 segundo para sa 95-92 bentahe ng TNT ay ipinasok naman ni Hopson ang kanyang 4-point shot sa natitirang 3.6 segundo para sa 96-95 abante ng Converge.

Nauna nang nakaba­ngon ang FiberXers mula sa 16-point deficit sa first half para agawin sa Tropang Giga ang kalama­ngan, 92-91, galing sa three-point play ni Cabagnot sa huling 39.2 segundo.

Samantala, babasagin ng NLEX at Rain or Shine ang kanilang pagkakatabla ngayong alas-7:30 ng gabi matapos ang upakan ng Meralco at Terrafirma sa alas-5 ng hapon sa Ninoy Aquino Stadium.