Akari magpapalakas sa quarterfinals
MANILA, Philippines — Target ang ikaanim na sunod na panalo, palalakasin ng Akari ang tsansa sa quarterfinals sa pagsagupa sa Galeries Tower sa crossover second round ng 2024 Premier Volleyball League (PVL) Reinforced Conference sa Philsports Arena sa Pasig City.
Magtutuos ang Chargers at Highrisers ngayong ala-1 ng hapon, habang haharapin ng Cignal HD Spikers ang Farm Fresh Foxies sa alas-3 ng hapon at ang sasagupain ng Capital1 Solar Spikers ang Nxled Chameleons sa alas-5 ng hapon.
Ang Akari (5-0), Cignal (4-1) at Capital1 (3-2) ang top three teams sa Pool B katapat ang mga bottom three ng Pool A na Galeries Tower (0-5), Farm Fresh (2-3) at Nxled (1-4).
Binubuo nila ang Pool D.
Bumandera sa Pool A ang Chery Tiggo (4-1), Creamline (4-1) at PLDT (4-1) na lalaban sa bottom squads ng Pool B na Choco Mucho (1-4), nagdedepensang Petro Gazz (2-3) at ZUS Coffee (0-5).
Sila ang nasa Pool C at maghaharap-harap sa Martes.
Ang top four teams mula sa dalawang pool ang aabante sa knockout quarterfinals.
Umiskor ang Chargers ng 15-25, 25-17, 25-19, 25-22 panalo sa HD Spikers tampok ang 24 points ni American import Oly Okaro, habang may 14 at 10 markers sina Ivy Lacsina at Ced Domingo, ayon sa pagkakasunod.
“Actually we have good players. I want to make improvements for everyone, not only this conference, but also for the future of Akari,” ani Japanese coach Taka Minowa.
- Latest
