Markkanen nagpahigot sa Jazz

CEBU, Philippines — Ang 2023 NBA All-Star forward nga si Lauri Markkanen mipirma og lima ka tuig nga contract extension uban sa Utah Jazz kagahapong adlawa.

Ang 27-anyos nga 7-footer gikan sa Finland maoy gibayaw nga Most Improved Player sa 2022-23 NBA season diin siya mi-average og career-high nga 25.6 puntos ug 8.6 rebounds matag duwa.

"I'm excited to get this extension done," matud pa ni Markkanen. "I'm ready to get back to work and build with this franchise. You guys deserve to win. Go Jazz."

Ang lab-as nga kontrata ni Markkanen uban sa Jazz mibalor og $238 million. Duna pa siya'y $18 million nga nahibilin sa kasamtangan niyang kontrata apan makadawat siya og $24 million sa sunod nga season ug $196 million sa mosunod nga upat ka tuig human niiin.

Apil sa ilang kasabotan nga dili puydeng i-trade si Markkanen hangtud sa sunod nga season.

Si Markkanen mi-average og 23.2 puntos ug 8.2 rebounds matag duwa sa miaging season alang sa Jazz, nga nagkupot og 31-51 rekord ug wala makasud sa playoffs sa ikaduhang sunod-sunod nga tuig. Ang Jazz wala na makaabot pa sa NBA Finals sukad sila gipidle sa Chicago Bulls nga gipangulohan ni Michael Jordan niadtong 1998.

Si Markkanen, nga nakaduwa og upat ka seasons sa Bulls ug usa ka tuig uban sa Cleveland Cavaliers, mi-average og 18.1 puntos ug 7.3 ka rebounds sud sa pito ka tuig niya sa NBA.