Westbrook adto punta sa Nuggets
CEBU, Philippines — Ang Denver Nuggets nagplano nga papirmahon og kontrata ang beteranong si Russell Westbrook isip usa ka free agent kon mahuman na og hikay ang mga waivers sa umaabot nga Hall of Famer. Sigun sa taho sa Denver Post, si Westbrook midawat sa $4 million niyang player option niadtong Hunyo aron mobalik sa Los Angeles Clippers.
Apan ang Clippers mibalhin kaniya pinaagi sa sign-and-trade ngadto sa Utah Jazz, nga andam makigsabot sa usa ka contract buyout aron si Westbrook makuha sa Nuggets.
Sigun sa ESPN nga ang Clippers modawat ni Kris Dunn gikan sa Jazz uban sa usa ka second-round draft pick ug cash nga wala ibutyag ang kantidad sa nakab-ot nilang kasabotan.
Si Westbrook mi-average og 11.1 puntos, 5.0 rebounds ug 4.5 assists isip bench player sa Clippers sa miaging season,
Nahimo siyang starter sud sa 11 lamang ka higayon sa Clippers, nga miposte og 51 ka daog sa wala pa gitagak sa Dallas Mavericks sa unang hugna sa playoffs.
Ang 35-anyos nga si Westbrook maoy NBA all-time leader sa triple-doubles nga miabot na ngadto sa 199.
Ang Nuggets maoy ikaunom nga team ni Westbrook sa miaging pito ka seasons sukad miduwa sa nag-unang 10 ka tuig sa iyang karera uban sa Oklahoma City Thunder. Sa Denver, iyang makauban si Serbian star Nikola Jokic, nga migiya sa Nuggets ngadto sa labing una nilang kampiyonato sa NBA niadtong 2023.
Apan ang Nuggets nahagba sa mga kamot sa Minnesota Timberwolves sud sa pito ka duwa sa ikaduhang hugna sa playoffs sa miaging season.
- Latest
