Oponganon misakmit sa unang gold medal

Central Visayas ikalima sa Palaro standings

CEBU, Philippines — Gikan sa silver ngadto sa gold.

Ang Oponganon nga si Asia Paraase nga nag-representa sa Region VII-Central Visayas midimdim sa mas tam-is nga kalamposan sa nasudnong bantawan human gilangkat ang unang gold medal sa 64th Palarong Pambansa kagahapong adlawa didto sa Cebu City Sports Center.

Emosyonal kaayo ang 17-anyos nga estudyante sa Pajo National High School sa dakbayan sa Lapu-Lapu kay midagayday gyud ang luha sa iyang mga mata human siya nanghawod sa secondary girls 3,000-meter run sa athletics event ning usa ka semanang torneyo alang sa labing hait nga mga atleta sa elementarya ug high school lukop nasud.

Ang bulawanong kadaogan ni Paraase nahimong mas espesyal gumikan kay iya kining nakab-ot pinaagi sa pagrehistro sa personal best niyang oras nga 10 minutos ug 27.36 segundo nga iya gihandum sa wala pa ang karera.

Si Chrishia Mae Tajarros sa Eastern Visayas mipatak og 10:39.72 orasan aron pagbira sa silver, samtang si Mary Jane Pagayon sa Davao Region ang mipugnit sa bronze sa oras nga 10:52.72.

“Ang ako lang gyud is ma pay off akong hardwork sa training and ma beat nako ako time, which is nahitabo gyud karon,” buhagay pa ni Paraase, usa sa mga nag-unang runners sa Sugbo nga gigalam ni Dr. Gerry Mayo sa Spectrum Running Club.

Usa kini ka maanindot nga kalamboan sa karera ni Paraase nga naka-silver lamang sa miaging edisyon sa tinuig nga kalihukan sa paugnat sa kusog nga gipahigayon didto sa Marikina City niadtong 2023.

Labaw sa tanan, nakapadasig kini og samot ni Paraase nga kab-oton ang iyang damgo nga makabitbit sa bandila sa nasud sa mga internasyonal nga kompetisyon sa umaabot.

Karong Sabado, Hulyo 13, si Paraase nanghinaut nga makalabni og laing gold sa dihang mokumbati siya sa 1,500m run.Sa overall medal standings, ang Central Visayas nagbarog sa ikapitong puwesto uban ang usa ka gold, upat ka ka silver, ug tulo ka bronze samtang sa pagsulat ning taho kagabii.

Nakuha sa Central Visayas ang upat niini ka silver gikan nilang Kharis Lark Reil Pantonial sa secondary boys 110m hurdles ug Jormaine Pinanonang sa elementary girls 100m hurdles sa athletics ug Kleone Mole sa secondary girls 400m freestyle sa swimming ug sa elementary boys 50m medley relay nga gilangkoban nilang Dave Kendrick Andersen, Rhonn Michael Lacierda, Travis Deandre Malnegro, ug Quiel Noreen Pilayre.

Samtang ang bronze gitunol nilang Ace Francis Bacongallo sa elementary boys long jump, ug Kacie Gabrielle Tionko sa secondary girls 400m freestyle ug Marco Juan Sayson sa secondary boys 100m backstroke sa   swimming.

Ang defending champion National Capital Region (NCR) maoy nagkupot sa temporaryong liderato bitbit ang 8-6-6 gold-silver-bronze tally, samtang ang Region VI-Western Visayas nahimutang sa ikaduhang dapit uban ang pito ka golds, upat ka silver, ug duha  ka bronze.

Naglangkob sa Top 6 ang Region IV?A/CALABARZON (6-5-2), Region III-Central Luzon (2-5-6), Region XII-SOCCSKSARGEN (2-0-4) ug Region XI-Davao Region (2-0-3).