CECABA season 17: Lucky Machinery Batch 2001 misakmit sa korona sa Division B

CEBU, Philippines — Ang Lucky Machinery Batch 2001 mi-sweep sa Fuente Oro Business Suites Batch 1994/99 pinaagi sa 56-47 nga desisyon sa Game 2 sa ilang best-of-three finals aron paglugwa nga kampiyon sa Division B sa Cebu Eastern College Alumni Basketball Association (CECABA) 17th Dr. Chen Lieh Fu Memorial Cup didto sa Chiang-kai Shek Gym sa CEC. Si Paul Gabatan maoy nangu sa Batch 2001 bitbit ang 20 puntos.

Ang Batch 2001 labaw lamang og usa ka lugas, 38-39, human sa tulo ka kuwarter.

Apan sila si Gabatan ug Aylwin Ong nagkumboya'g 13 puntos sa panapos nga 17-9 rally nga nagtukmod sa Batch 2001 ngadto sa nuybe puntos nga kadaogan. Si Ong mihipos og otso puntos, sayes niini iyang gibubo sa mainit nilang ataki sa endgame.

Sila si Ryan Racal, Marlon Lao, Eric Cabana, Dennis Yankee, ug Primo Reyes mihimo sab og kasikas human nagkumbinar og 28 puntos alang sa Batch 2001. Ang ubang mga sakop sa Batch 2001 ubos sa paggiya ni coach Arnel Salado mao sila si Eric Galvin Go, Arnel Branzuela, Alexander Brian Pena, Benedict Sun, Steve Macias, Jaime Miranda Sy, Cris Claret, Jake Uy, ug Francis Yaun.

Sa laing bahin, si Mark Bukiron mitali og 13 puntos sa pilderong Batch 1994/99.