2024 CEPCA President's Cup gitakda sa Mayo 18

CEBU, Philippines — Andam na ang tanan alang sa 2024 Cebu Executives and Professionals Chess Association (CEPCA) President's Cup Open Chess Tournament nga gikatakda karong Mayo 18 didto sa Robinsons Galleria Cebu.

Miabot ngadto sa P30,000 nga ganting salapi ang iapud-apud sa mga mananaog ning tinuig nga torneyo nga gipasiugdahan ni CEPCA President Engr. Jerry Maratas isip kabahin sa selebrasyon sa adlaw niyang natawhan.

Ang makampiyon mobulsa og P8,000, samtang ang mopahiluna sa ikaduha ngadto sa ikalimang dapit makadawat og P5,000, P3,000, P2,000, ug P1,000.

Ang mo-okupar sa ikaunom ug ikapitong puwesto adunay P800 ug P700, ang 8th-10th mokubra og P500, samtang ang 11th-15th mokabi og P300 matag usa.

Ang top 2 sa mga Cepcans A ug B, seniors, ladies, ug Under 8, 12, 16, ug 20 nga mga partisiante hatagan og P500 ug P300 nga insentibo.

Nagkantidad ang rehistrasyon og P300 sa mga regular players ug P200 niadtong mga dunay diskwento.

Kadtong interesado moapil mahimong mopadala sa ilang bayad direkta sa Gcash account ni Kevin Yap nga 0945-8559800.