Lebron, Lakers NBA playoffs ang tirada batok sa Pelicans

CEBU, Philippines — Si LeBron James mosuway pag-inat sa ika-21 ka tuig niyang kampanya sa NBA sa dihang ang iyang Los Angeles Lakers makigharong sa New Orleans Pelicans pagsikad sa gikahinaman nga play-in tournament karong adlawa didto sa Smoothie King Center sa New Orleans, Louisiana.

Ang modaog sa ilang sangka maka-angkon og luna sa playoffs isip No.7 seed sa Western Conference ug dayon makig-atang sa No.2 seed nga defending champion Denver Nuggets sa unang hugna.

Gibalhiboan sa Lakers ang Pelicans sa katapusan nilang duwa sa regular season niadto lamang Dominggo.        Si James mipahimangno hinoon sa iyang mga kauban nga dili sila angayan mokompiyansa kay ang Pelicans seguradong nagpangagot nga makabawos kanila.

"They're going to be extremely ready for us, and we have to come in with the same sense of urgency," matud pa ni James, nga sa edad nga 39 anyos nagpabiling usa ka dominanteng puwersa sa liga.

Ang mapilde sa duwelo tali sa Lakers ug Pelicans duna pa hinooy tsansa nga makatikang sa playoffs kay ilang mang engwentrohon ang modaog sa tinagakay nga duwa tali sa Sacramento Kings ug Golden State Warriors.

Sa miaging season, ang Lakers nag-agi sab og play-in sa wala pa molahutay ngadto sa West Finals diin sila giserohan sa Nuggets ubos sa pagpangu ni Nikola Jokic.

Mas nindot ang gipakita sa Miami Heat sa play-in diin siya mitapos nga No.8 seed sa East apan nakaabot sa NBA Finals diin sila gipakaging sab sa Nuggets sud sa unom ka duwa.

Suwayan sa Heat pagsubay ang susamang dalan sa dihang mobiyahe sila didto sa Philadelphia karong Huybes aron makigpinaksitay sa 76ers.

Ang modaog mosud sa playoffs  diin nag-atang kanila ang No.2 seeed New York Knicks.

"We've had some great battles with (Miami)," dason pa ni 76ers coach Nick Nurse. "I always expect that versus them."

Si Nurse masaligon nga ang alas nilang si reigning MVP Joel Embiid andam na kaayong makiggubat batok sa Heat.

Ang Sixers nagkupot og 31-8 rekord samtang nagduwa uban kanila si Embiid ning season.

Ang mapilde sa bugno tali sa Heat ug Sixers makigharong sunod sa modaog tali sa Atlanta Hawks ug Chicago Bulls alang sa ikawalo ug katapusang luna sa East playoffs diin ilang makabangga ang haring gangis nga Boston Celtics.