Wolves mi-sweep sa Suns; Knicks, Pacers 3-1 na

CEBU, Philippines — Si Anthony Edwards mipabuto og 40 puntos sa dihang gi-sweep sa Minnesota Timberwolves ang Phoenix Suns pinaagi sa 122-116 nga kadaogan sa Game 4 sa ilang NBA Western Conference first-round playoff series kagahapon didto sa Footprint Center sa Phoenix, Arizona.

Ang Timberwolves nakasugakod sa gikumbinar nga 72 puntos nilang Devin Booker ug Kevin Durant aron sirohan ang Suns, 4-0, ug mamahimong labing unang team nga nakaabot sa ikaduhang hugna.

Mao sab kini ang unang pagtaak sa Wolves sa ikaduhang hugna sa NBA plyaoffs sud sa 20 ka tuig.

Sangkaon sunod sa Wolves ang modaog sa serye tali sa Denver Nuggets ug Los Angeles Lakers diin ang Nuggets maoy kasamtangang naglabaw sa baraha nga 3-1.

Si Booker mipabuhagay og49 puntos samtang si Durant midugang og 33 puntos apan pareho silang naminghoy kay hingpit nang nanamilit ang Suns sa liga.

Didto sa Dallas, ang Los Angeles Clippers mikolapso human mi-abante og 31 puntos apan nakamaneho pagipsot ngadto sa 116-11 nga kadaogan batok sa Dallas Mavericks aron tablahon ang ilang serye, 2-2.

Si Paul George mitagak og 26 sa iyang 33 puntos sa first half, samtang si James Harden mibubo og 15 sa iyang 33 puntos sa katapusang kuwarter alang sa Clippers. Si Kyrie Irving mikadlit og 40 puntos samtang si Luka Doncic miposte og triple-double nga 29 puntos, 10 ka rebounds, ug 10 ka assists sa pilderong Mavs.

Sa Eastern Conference, ang New York Knicks ug ang Indiana Pacers parehong mikadlit og 3-1 nga labaw batok sa tagsa-tagsa nila ka mga karibal. Si Jalen Brunson mipaulbo og playoff franchise-record nga 47 puntos uban ang 10 ka assists sa dihang gipakaging na sab sa Knicks ang Philadelphia 76ers, 97-92.

Mihimo sab og kasikas si OG Anunoby bitbit ang 16 putnos ug 14 ka rebounds alang sa Knicks.

Didto sa Indianapolis, ang Indiana Pacers miposa og 22 ka 3-pointers sa 126-113 nilang paglampornas sa Milwaukee Bucks nga padayong nagkagidlay kay wala ang injured nilang alas nga si Giannis Antetokounmpo.

Si Myles Turner milasang og playoff career-high nga pito ka tres sa iyang 29 puntos samtang si Tyrese Haliburton miamot og 24 puntos sa  Pacers.