"Bakbakan sa Masbate" Paradero mopakita og aksiyon sa unang edisyon sa ATK Promotions boxing series
CEBU, Philippines — Ang kanhi world title challenger nga si Robert "Super Inggo" Paradero maoy mangu sa listahan sa mga boksidor nga mowadwad sa ilang abilidad sa labing unang edisyon sa "Bakbakan sa Masbate" boxing series nga gipasiugdahan sa ATK Promotions ni Gobernador Antonio Kho karong Sabado, Abril 20, didto sa Cataingan Astrodome sa Cataingan, Masbate.
Ang 27-anyos nga si Paradero, kumad gikan sa Bukidnon, makighilam-osay og kumo ni Charlie Pizon Malupangue sa Zamboanga del Norte sa usa ka non-title bout sud sa walo ka hugna ubos sa flyweight division.
Isip pro, si Paradero mihimo og impresyon human miharos og daog sa nag-una niyang 18 ka away.
Apan sa kalit lang misukarap ang karera ni Paradero human napakyas sa iyang tinguha nga sakmiton World Boxing Association (WBA) minimumweight title sa dihang gipilde sa kababayan niyang si Vic "Vicious" Saludar pinaagi sa split decision niadtong Pebrero 20, 2021 didto sa Binan City Football Stadium sa Laguna.
Sukad niadto, si Paradero nakahiagum og unom ka sagunson nga pilde, apil na ang laing makabuak sa dughan nga split decision batok ni April Jay "Astroboy" Abne sa ARQ Stable sa ilang OPBF Silver flyweight championship match niadtong Abril 15 sa miaging tuig didto sa Hoops Dome s Lapu-Lapu City.
Naghinaut sa Paradero nga putlon ang sunod-sunod niyang malas sa dihang iyang harongon si Malupangue, nga nagkupot og 9-11-4 rekord uban ang 6KOs.
Lain pang mokumbati mao sila si Sherwin Dacullo vs Sandre Paderan, Datu Adam vs Jerry Tabago, ug Joy Ebcas vs Christian Salazar. Sa dili pa ang aksiyon sa pro, adunay 20 ka amateur bouts nga nakalinya aron paglingaw sa mga manan-aw.
"We want to showcase the skills of young talents in Masbate who are eager to embrace the world of boxing. We want to help these aspiring kids achieve their dreams of becoming elite fighters and future champions of the sport," matud pa ni Masbate Governor Antonio Kho sa usa ka pamahayag.
- Latest
