Thunder milugwa nga top seed sa West

CEBU, Philippines — Sa wala damha nga eksena sa kadaghanan, ang Oklahoma City Thunder maoy miangkon sa Western Conference top seed pagpahuman sa aksiyon sa NBA regular season kagahapong adlawa.

Kini human gilapornas sa Thunder ang Dallas Mavericks, 135-86.

Ang Thunder nagtabla ug ang defending champion Denver Nuggets, nga nagkupot sab og 57-25 nga baraha human gipayaka ang Memphis Grizzlies, 126-111. Apan ang Thunder maoy mipahiluna sa unang puwesto sa West tungod kay nakabentaha sila sa head-to-head record batok sa Nuggets.

Ang Minnesota Timberwolves duna sab untay tsansa nga birahon ang No.1 seed apan nabaraw ang ilang tinguha human sila mahagba sa mga kamot sa Phoenix Suns, 125-106.

Tungod niini, ang Suns milabni sa ikaunom ug katapusang awtomatik nga luna sa West playoffs diin ilang makasangka og usab ang No.3 Wolves sa unang hugna.

Didto sa New Orleans, si LeBron James mipupo og 28 puntos, 11 ka rebounds ug 17 ka assists alang sa ika-112 nga triple-double sa iyang karera sa dihang gibalhiboan sa Los Angeles Lakers ang Pelicans, 124-108, aron paglandig nga ikawalo sa West.

Luyo sa ilang kaparotan, ang Pelicans nadakin-as sa ikapitong dapit ug mosakbang og usab sa Lakers sa play-in tournament diin ang modaog  mo-abante sa playoffs isip 7th seed.

Samtang ang Golden State Warriors mipukan sa Utah Jazz, 123-116, aron silyohan ang katapusang luna sa play-in. Makaharong sunod sa Warriors ang Sacramento Kings, nga mikastigo sa Detroit Pistons 123-95.

Ang modaog sa bugno tali sa Wariors ug Kings makigtige sa mapilde sa duwelo tali sa Lakers ug Pelicans alang sa ikawalo ug pinal nga luna sa West playoffs. Sa Eastern Conference nga gidominar sa Boston Celtics , New York Knicks, ug Milwaukee Bucks, ang Indiana Pacers mitikang sa playoffs isip No.6 seed human gipasukarap ang Atlanta Hawks, 157-115.

Ang Pacers makig-atbang sa Bucks sa unang hugna. Ang Cleveland Cavaliers, nga duna untay tsansa nga mamahimong No.2, nalabaog sa ikaupat nga dapit human miyukbo sa Charlotte Hornets, 120-110. Ilang makaharong ang Orlando Magic sa unang hugna.