Lakers lusot sa Bucks sa double overtime
MILWAUKEE — Inilista ni Austin Reaves ang kanyang ikalawang career triple-double at ipinasok ang isang tiebreaking 3-pointer sa huling 38.6 segundo sa second overtime sa 128-124 pagtakas ng Los Angeles Lakers sa Bucks.
Tumapos si Reaves na may 29 points, 14 rebounds at 10 assists para sa ikaapat na dikit na arangkada ng Los Angeles (40-32) habang humakot si Anthony Davis ng 34 points at 23 rebounds.
Hindi naglaro si LeBron James dahil sa kanyang left ankle sprain.
Tumipa si D’Angelo Russell ng 29 points, 12 assists at 7 rebounds at nagposte si Rui Hachimura ng 16 points at 14 rebounds.
Kumolekta si Giannis Antetokounmpo ng 29 points, season-high 21 rebounds at 11 assists para sa kanyang pang-siyam na triple-double sa season sa panig ng Milwaukee (46-26).
Nag-ambag si Damian Lillard ng 27 markers kasunod ang 21 points ni Malik Beasley.
Sa New Orleans, humataw si Jalen Williams ng 26 points para tulungan ang Oklahoma City Thunder (50-21) sa 119-112 paggiba sa Pelicans (44-28).
Sa Sacramento, kumamada si Luka Doncic ng 28 points sa 132-96 pagdaig ng Dallas Mavericks (43-29) sa Kings (42-30).
Sa Miami, nagbalik si Klay Thompson sa starting lineup at bumira ng 28 points habang may 18 markers si Jonathan Kuminga sa 113-92 panalo ng Golden State Warriors (37-34) sa Heat (39-33).
Nag-ambag sina Stephen Curry at Andrew Wiggins ng tig-17 para sa Golden State na nagposte ng 22-point lead sa fourth quarter matapos maiwanan sa halftime, 53-55.
- Latest
