Irving mipaluhod sa kanhi team sa iyang pagbalik sa Brooklyn

CEBU, Philippines — Si Kyrie Irving mibalik sa Brooklyn aron pakagingon ang kanhi niya team nga Nets.

Sa unang anibersaryo sukad siya gi-trade didto sa Dallas, si Irving mipabuhagay og 36 puntos aron pangulohan ang Mavericks ngadto sa 119-107 nga pagpayaka sa Nets sa NBA kagahapon didto sa Barclays Center sa New York.

Nakadawat si Irving og mga suliyaw gikan sa fans apan nakapuntos na siya og 16 sa sayong bahin pa lamang sa ikaduhang kuwarter. Gipahilom niya ang kanhi saba nga mga nanan-aw pinaagi sa makapakurat niyang dunk sa ikatulong kuwarter gikan sa usa ka alley-oop nga nakahatag sa Mavs og 74-52 nga labaw.

Ang eight-time All-Star miposa og unom sa 10 niya ka 3-pointers, duha niini iyang gibomba sa katapusang kuwarter nga nakapapha sa tinguha sa Nets nga makabawi.

Misalida sab si Luka Doncic uban ang 35 puntos, 18 ka rebounds ug siyam ka assists alang sa Mavs nga nagkupot na karon og 28-23 rekord samtang gitagak ang Nets ngadto sa 20-30.

Sa laing duwa, ang kanhi teammate ni Irving sa Brooklyn nga si Kevin Durant mikadlit og 28 puntos ug si Devin Booker mibubo og 32 puntos sa dihang gipayaka sa Phoenix Suns ang Milwaukee Bucks, 114-106.

Si Giannis Antetokounmpo miwadwad og 34 puntos apan wala makapugong sa Bucks nga masugamak sa ikaupat nilang pilde sa lima ka duwa sukad si Doc Rivers nahimo nilang head coach sa miaging bulan.

Sa laing aksiyon, ang New York Knicks mibuntog sa Memphis Grizzlies, 123-113, apan gipaningot sa kakuyaw tungod sa posibleng injury nga nahiaguman sa bitoon nilang si Jalen Brunson.

Si Brunson mihipos og 27 puntos ug walo ka assists sa wala pa ma-angol ang tiil sa nahibilin nga 5:31 sa duwa.

Didto sa Florida, ang Miami Heat mikastigo sa Orlando Magic,121-95.

Pito ka players sa Heat ang mirehistro og double figures ubos sa pagpangu ni Jimmy Butler uban ang 23 puntos, walo ka rebounds ug walo ka assiss.

Nagparamdam sab si Pascal Siakam nga mikolekta og 29 puntos sa dihang giugbok sa Indiana Pacers ang Houston Rockets, 132-129, aron inaton ang ilang baraha ngadto sa 29-23.