Damgo nga natuman sa "assassin": Ian Abne misakmit sa unang korona

CEBU, Philippines — Ang way pildeng boksidor sa ARQ Stable nga si Ian Paul "The Assassin" Abne mi-away nga nagkadugo ang nawong sa halos tibuok nga bahin sa 10 ka hugna nga away.

Nagbunga hinoon ang determinasyon ni Abne sa dihang iyang gipiog ang lig-on sab kaayong si Darwin "Cool Boy" Boyones sa Biñan City, Laguna aron sakmiton ang Philippine Boxing Federation (PBF) minimumweight title atol sa "Engkwentro 13"

sa ARQ Sports Promotions niadtong Miyerkules sa gabii (Mayo 1) didto saa Mandaue City Cultural and Sports Complex.

Human sa tentatibong sinugdanan, nagsugod og dagayday ang dugo sa tuo nga bahin sa nawong ni Abne tungod sa gisi nga iyang nahiaguman sa ikaduihang hugna.

Apan ang 24-anyos nga garbo sa Cagayan de Oro City mipakita og dalayong kaisog taliwala sa iyang sitwasyon aron dominahon si Boyones sa ikatulong hughna.

Ang labing nindot nga salida ni Abne nahitabo sa ikapitong hugna diin siyang gipalukapa si Boyones tulo ka higayon.

Nakasugakod hinoon si Boyones sa gihimong pagkastigo kaniya ni Abne hangtud sa katapusang pagbagting.

Wala na hinooy lalis pa asa pabor ang resulta.

Si Abne mihimo og impresyon sa tanang tulo ka mga judges sa iskor nga 100-88, 98-89, ug 98-89 aron birahon ang labing unang korona sa iyang karera. "Una sa tanan, nagpasalamat ko sa Ginoo sa paghatag niya nako niining kadaogan," matud pa ni Abne. "Salamat sab kaayo sa akong manager nga si sir Jason Arquisola ug sa iyang wife nga amo promoter nga si mam Eva Arquisola sa gihatag nilang opoturnidad nako ug ingon man sa tanan namong coaches sa kanunay nilang suporta."

"Grabi kaayo akong kalipay kay ako gyud ning pangandoy sukad pa sa una nga makadaog og belt. Damgo gyud ni nga natuman para nako," dugang pa sa manghud ni OPBF Silver flyweight champion April Jay "Astroboy" Abne.   

Si Abne, nga rated No.31 sa World Boxing Council (WBC) ug No.14 sa International Boxing Federation (IBF), nagkupot na karon og 11-0-1 record uban ang 4KOs, samtang si Boyones natagak sa 6-4 uban ang 4KOs.