J Store kampiyon sa North Shooters Club Season 4
CEBU, Philippines — Nakadawat og sayong pinaskohan ang RJ Store human gipilde ang Kamaru, 78-68 aron sakmiton ang korona sa North Shooters Ball Club Season 4 Christmas League 2023 niadtong Huwebes sa gabii diha sa J&J Gym sa Lilo-an, Cebu.
Si Jhonel Degamo ang topscorer sa RJ Store pinaagi sa iyang 19 puntos, lakip ang iyang mga puntos sa fourth quarter nga nakainat sa labaw sa team ni Mark Louie Pepito.
Ikaduhang topscorer mao si Jowil Sugarol, kinsa nangigo gikan sa 3-point area atol sa ikatulong kuwarter aron mohipos sa kinatibuk-an niyang 16 puntos. Nangigo sab og maayo si Aljer Comendador nga dunay 12 puntos.
Ligas pa ang duwa sa first period diin nagsinukliay og mga puntos ang duha ka koponan aron tapuson ang maong kuwarter, 15-13 pabor sa Kamaru. Miburot pa ang labaw sa Kamaru ngadto sa 35-29, apan hinay-hinay kining nihiyos hangtod nailog sa RJ Store ang bentaha sa wala pa kini niposte og 60-48 paghuman sa third quarter.
Niaksyon og gukod ang Kamaru sa fourth period pinaagi nilang Michael Rojo, Toper Pilapil ug Renz Cano, apan wala mosalir ang ilang mga paningkamot kay nasukamod ang ilang koponan.
Si Pilapil ang nangulo sa Kamaru ni team owner Merlou Mercader nga mibagnos og 18 puntos, gisundan ni Cano sa iyang 15 puntos, samtang si Rojo dunay 14 puntos.
Sa sayo pa, ang Hardway ni Jhon Lie Caumeran midaog pinaagi sa default batok sa Unicast ni Lucas Suarez aron otomatik mopahiluna sa ikatulong dapit sa nagmalampuson nga liga nga gidumala ni ballclub president Merlou Mercader ug vice president Arnold Astillero, ingon man sa magtiayong Rey ug Gina Bajamonde nga maoy nihatag sa mga premyo. (BANAT NEWS)
- Latest
